ललितपुर १६ लाई भेट्रान टिम उपाधि

ललितपुर महानगरपालिका वडा १६ ले पाँचौं अल नेपाल अन्तरवडा राष्ट्रिय टेबलटेनिस प्रतियोगिताको भेट्रान ४० वर्षमाथि पुरुष टिम इभेन्टको उपाधि शुक्रबार जितेको छ ।
लैनचौरस्थित राष्ट्रिय टेबलटेनिस प्रशिक्षण केन्द्रमा भएको फाइनलमा प्रकाश धाक्वा, राजेन्द्र श्रेष्ठ, रितम शाक्य, सुरज वज्राचार्य र राजु शाक्यको टोलीले ललितपुर २० का राजिप महर्जन, संघरत्न डंगोल, सुरेश वज्राचार्य, सञ्जय शाक्य र धनबहादुर महर्जनको टोलीलाई ३–० ले पराजित ग¥यो । ललितपुर ९ र ललितपुर ११ तेश्रो बने ।
स्पिन इभेन्ट्सको व्यवस्थापन तथा स्पिन टेबलटेनिस क्लबको आयोजनामा भइरहेको प्रतियोगिताको अन्तिम दिन शनिबार ५ स्पर्धाको फाइनल हुनेछ ।
पुरुष खुला सिंगल्स ललितपुर १६ का संयोग कपाली र ललितपुर ८ का रुविन महर्जनले फाइनल खेल्ने छन् । महिला सिंगल्समा संखुवासभा ४ की वियंका राई र शिवसताक्षी ८ की इभाना थापा उपाधिका लागि भिड्ने छन् ।
त्यस्तै भेट्रान ४० वर्षमाथि पुरुष सिंगल्समा काठमाडौं महानगरपालिका २६ का चन्दन शाही र ललितपुर २ का समिप श्रेष्ठ, पुरुष टिम इभेन्टमा ललितपुर ८ र ७ तथा भेट्रान ५० वर्षमाथि पुरुष सिंगल्समा ललितपुर ११ का राजेन्द्र वज्राचार्य र कीर्तिपुर ६ का जयराम महर्जनले फाइनलमा प्रतिस्पर्धा गर्ने छन् ।