काठमाडौं । अब आन्तरिक हवाई यात्रामा ६० वर्षमाथिका ज्येष्ठ नागरिक तथा फरक क्षमता भएका यात्रुहरूले ठूलो राहत पाउने भएका छन् । ७० वर्ष र सोभन्दा माथिका नागरिकलाई हवाई टिकटमा ५० देखि ८० प्रतिशतसम्मको छुट प्रदान गर्ने निर्णय गरेको हो ।
नेपाल नागरिक उड्डयन प्राधिकरणले हवाई भाडामा न्यूनतम ५० प्रतिशत छुट दिने निर्णय गरेको छ । यसले विशिष्ट वर्गका यात्रुहरूलाई सहज र सुलभ यात्रा अनुभव गराउने अपेक्षा गरिएको प्राधिकरणले जनाएको छ ।
प्राधिकरणको आइतबार बसेको बैठकले उक्त छुट व्यवस्था तत्काल लागू गर्ने निर्णय गरेको हो । ६० वर्षभन्दा माथिका नागरिकले आन्तरिक उडानमा आधा भाडा तिरेर यात्रा गर्न सक्नेछन् ।
त्यस्तै, शारीरिक रूपमा अशक्त तथा फरक क्षमताका व्यक्तिहरूका लागि पनि सोही छुटको व्यवस्था गरिएको छ । प्राधिकरणले देशका सम्पूर्ण आन्तरिक हवाई सेवा प्रदायक कम्पनीहरूलाई आजैदेखि निर्णय कार्यान्वयन गर्न निर्देशनसमेत दिएको छ ।
