काठमाडौँ / राजधानीको लैनचौरस्थित ‘एनसेल आइकन’ मुख्यालयमा भदौ २४ गते जेनजी आन्दोलनका नाममा अपराधी समूहले तोडफोड, आगजनी र डकैती गरेको भन्दै एनसेलले जिल्ला प्रहरी कार्यालय, काठमाडौंमा उजुरी दर्ता गराएको छ।
कम्पनीले दिएको उजुरीमा सुरक्षाकर्मीलाई धम्क्याउँदै कोठामा थुनी कार्यालयका सिसा फुटाउने, उपकरण तोडफोड गर्ने, आगजनी गर्ने र बहुमूल्य सम्पत्ति लुटपाट गर्ने कार्य भएको उल्लेख छ। अपराधीहरूले सक्कल प्रमाणपत्र, अनुमतिपत्र, जग्गाधनी कागजात, नगद, सेफ, ल्यापटप, गहना तथा विद्युतीय उपकरणसहित महंगा सवारी साधनसमेत लुटी केहीमा आगजनी गरेको कम्पनीको दाबी छ।
एनसेलले घटनाबाट ठूलो आर्थिक तथा भौतिक नोक्सानी पुगेको जनाउँदै सम्पूर्ण क्षतिको विवरण तथा लुटिएका सम्पत्तिको सूची प्रहरीलाई उपलब्ध गराइसकेको छ। साथै, अनुसन्धानलाई सहयोग पुगोस् भन्ने उद्देश्यले सबै सिसिटिभी फुटेज पनि प्रहरीलाई हस्तान्तरण गरिएको कम्पनीले जनाएको छ।
उक्त उजुरीमा तोडफोड, डकैती र आगजनीमा संलग्न अपराधीलाई तत्काल पक्राउ गरी कारबाही गर्न, लुटिएको सम्पत्ति फिर्ता दिलाउन र क्षतिपूर्ति दिलाउन माग गरिएको छ।
