सिन्धुली । सिन्धुलीको गोलन्जोर गाउँपालिका–६ मा एकै परिवारका १६ जना सदस्य गाउँबाट अचानक बेपत्ता भएका छन्। सोमबार बिहानदेखि सम्पर्कविहीन बनेको सो परिवारको खोजीका लागि प्रहरी परिचालन गरिएको छ।
जिल्ला प्रहरी कार्यालय सिन्धुलीका अनुसार छेत्पा नजिकै भण्डास बिप्पर कटेरीमा बसोबास गर्दै आएकी उर्मिला हायुको परिवार सोमबार बिहानदेखि सम्पर्कमा छैन। स्थानीयले उक्त परिवार सम्पर्कविहीन भएको सूचना प्रहरीलाई दिएका थिए।
उक्त सूचनाका आधारमा प्रहरी टोली हायुको घरमा पुगेर अनुसन्धान थालेको सिन्धुली प्रहरीले जनाएकाे छ ।
घरमा कस्तो खालको क्षती भएको हो भन्ने खुलेको छैन। प्रहरीका अनुसार हराएका परिवारका सदस्यहरूको बारेमा स्थानीय जनप्रतिनिधि र गाउँलेहरूसँग पनि सोधपुछ भइरहेको छ। बेपत्ता परिवारको अवस्थाबारे अझै स्पष्ट हुन बाँकी रहेको प्रहरीले जनाएको छ।
प्रहरीले घटनालाई रहस्यमय भन्दै अनुसन्धानलाई प्राथमिकता दिएको छ।
