काठमाडौँ । जेठ २७, विश्वप्रसिद्ध अमेरिकी फुटवेयर ब्रान्ड स्केचर्स (Skechers) ले नेपालमै पहिलो पटक आफ्नो आधिकारिक स्टोर सञ्चालनमा ल्याएको छ।दरबारमार्गस्थित स्केचर्सको यो नयाँ स्टोर तीन करोड रुपैयाँको प्रारम्भिक लगानीमा स्थापना गरिएको हो। शुक्रबारदेखि स्टोरको औपचारिक उद्घाटनसँगै बिक्री सुरु भएको कम्पनीले जानकारी दिएको छ।
हालको लागि दरबारमार्गको यो स्टोर नै नेपालमा स्केचर्सको एक मात्र आधिकारिक स्टोर हो। कम्पनीले आगामी असोज महिनाभित्रै सुन्धारास्थित सिभिल मल मा दोस्रो स्टोर सञ्चालनमा ल्याउने तयारी गरिरहेको बताएको छ। त्यस्तै, कमलपोखरीस्थित सिटी सेन्टरमा अर्को स्टोर खोल्ने योजनासमेत अघि सारिएको छ।
स्टोरमा २०२५ सिजनका नवीनतम फुटवेयर संग्रहहरू उपलब्ध छन्। साथै, केवल आधिकारिक च्यानलमार्फत उपलब्ध हुने एक्सक्लुसिभ इनलाइन उत्पादनहरू समेत ग्राहकले यही स्टोरबाट खरिद गर्न सक्नेछन्। स्केचर्सका उत्पादनहरू विशेषगरी आधुनिक डिजाइन, आरामदायी बनावट र नवीन प्रविधिमा आधारित हुने भएकाले यी जुत्ता चप्पललाई विश्वभर उच्च गुणस्तरको फुटवेयरको रूपमा चिनिन्छ।
जीवनशैली र परफरमेन्स दुवैका लागि उपयुक्त स्केचर्सका जुत्ता अब नेपाली ग्राहकले नेपालमै सहज रूपमा खरिद गर्न सक्ने भएका छन्। यसअघि यो ब्रान्डका उत्पादनहरू खरिद गर्न ग्राहकहरूलाई अमेरिका लगायत तेस्रो मुलुकबाट मगाउनु पर्ने बाध्यता थियो।
कम्पनीका प्रबन्ध निर्देशक विश्वास थोकरका अनुसार, “नेपालमा स्केचर्सको सम्पूर्ण रिटेल अनुभव प्रस्तुत गर्न पाउँदा हामी अत्यन्त उत्साहित छौं। यो स्टोर हाम्रो नेपाली ग्राहकप्रति समर्पण र विश्वस्तरीय सेवा प्रदान गर्ने संकल्पको महत्वपूर्ण सुरुआत हो।”
थोकरले यसै आर्थिक वर्षभित्रै उपत्यका बाहिर विभिन्न स्थानहरूमा पनि स्टोर विस्तार गर्ने योजना रहेको उल्लेख गरेका छन्।
दरबारमार्गको प्रमुख व्यापारिक केन्द्रमा खुलेको यो स्टोरले सजिलो, स्टाइलिश र गुणस्तरीय फुटवेयरको खोजीमा रहेका नेपाली उपभोक्ताका लागि नयाँ विकल्प प्रस्तुत गरेको छ। यो ब्रान्ड नेपालमा आफ्नो उपस्थिति विस्तार गर्दै रिटेल बजारमा नयाँ प्रतिष्पर्धा र उत्साह ल्याउने संकेत देखिएको छ।
