काठमाडौं । वर्षाका कारण बीपी राजमार्ग अवरुद्ध हुँदै यात्रामा रहेका यात्रु मारमा परेका छन् ।
सोमबार अपराह् परेको वर्षाले रोशी खोलामा आएको बाढीले सोमबार राति डाइभर्सन बगाउँदा अवरुद्ध भएको सडक अझै सञ्चालनमा आएको छैन ।
सोमबार रातिदेखि नै अवरुद्ध राजमार्ग खुलाउने प्रयास भइरहेको इलाका प्रहरी कार्यालय मंगलटारले जनाएको छ । अवरुद्ध भएको राजमार्ग दुईतर्फी सञ्चालनमा नआउदा सवारी साधनको लामो लाइन बढेको छ ।
बाढीले रोशी ९ मंगलटारको बोक्सीकुनामा डाइभर्सन बगाएको स्थानमा एकतर्फी राजमार्ग खुलाइएको छ । प्रहरीले राजमार्गमा अलपत्र १७ यात्रुको उद्धार गरेको जनाएको छ ।
पूर्वबाट आइरहेको सवारीलाई खुर्कोट र नेपालथोकमा तथा काठमाडौंबाट पूर्व गइरहेका गाडीलाई भकुण्डेबेसीमा रोकिएको छ ।
