काठमाडौं । फागुन १४, दुई भारतीय खेलाडी टिस्टा तोर्सा टेबलटेनिस क्लबका श्रोवन पाउल र दार्जिलिङ टेबलटेनिस एसोसिएसनकी प्राची घोषले सातौं सम्झना कप अन्तर्राष्ट्रिय टेबल टेनिस प्रतियोगितामा बिहीबार स्वर्ण जितेका छन् । यु–१६ सिंगल्सको ब्वाइजमा श्रोवन र गल्र्समा प्राची पहिलो भएका हुन् ।
लैनचौरस्थित राष्ट्रिय टेबलटेनिस प्रशिक्षण केन्द्रमा भएको ब्वाइज फाइनलमा श्रोवनले एभीएम टेबलटेनिस क्लबका प्रजिल भट्टराईलाई ३–२ ले पराजित गरे । श्रोवनले २–० ले पछि परेको स्थितिलाई उल्ट्याउदै नतिजा आफ्नो पक्षमा पारेका हुन् । प्रतिस्पर्धात्मक फाइनल श्रोवनले ६–११, १२–१४, ११–८, ११–८ र ११–८ ले जिते । ट्यालेन्ट स्काउट टेबलटेनिस हबका श्रीराज वर्दान र यलका अर्नव श्रेष्ठ तेश्रो बने ।
गल्र्सको उपाधि भिडन्तमा प्राचीले ग्लोबल टेबलटेनिस एकेडेमीकी सचारी चक्रबर्तीलाई ११–१, ११–९ र ११–४ ले सहजै पराजित गरिन् । नेपाल प्रहरीकी शुभश्री श्रेष्ठ र टिस्टा टोर्साकी श्रुति दास तेश्रो भए । यु–१६ को दुवै समूहमा शीर्ष तीन स्थान हात पार्नेले क्रमशः २० हजार, १० हजार र ५–५ हजार नगद पुरस्कार प्राप्त गर्ने छन् ।
ललितपुर टेबलटेनिस क्लबको आयोजनामा भइरहेको प्रतियोगितामा योसंगै ४ स्वर्णको टुंगो लागेको छ । यसअघि टिम इभेन्टको पुरुषमा ललितपुर टेबलटेनिस क्लब र महिलामा ग्लोबलले स्वर्ण जितेका थिए । प्रतियोगितामा जम्मा ९ स्पर्धा समावेश छन् ।
प्रतियोगिताको मुख्य स्पर्धा पुरुष÷महिला सिंगल्समा लिग चरणका खेल भइरहेका छन् । पुरुषमा तेश्रो तथा महिलामा पहिलो चरणको खेल सकिएको छ ।
