चीन । चीनले मंगलबार ७५ औँ राष्ट्रिय दिवस मनाइरहेको छ ।
जनवादी गणतन्त्र चीन स्थापनाको ७५ औँ वार्षिकोत्सवको अवसरमा चिनियाँहरूले आफ्नो, घर, सडक र टोलटोलमा राष्ट्रिय झन्डा फहराउँदै राष्ट्रिय दिवसमा सामेल भएका छन् ।
चीन सरकारले आजदेखि लागु हुने गरी सात दिन लामो छुट्टी दिएको छ । राष्ट्रिय दिवसको अवसरमा चीन सरकारले सातदिने राष्ट्रिय दिवस मनाउने घाषणा गरेको जनाइएको छ ।
सन् १९४९ अक्टोबर १ मा जनवादी गणतान्त्रिक देश घोषणा भएको चीनले बर्सेनि अक्टोबर १ मा राष्ट्रिय दिवस मनाउँदै आएको छ ।
सन् १९२१ मा चिनियाँ कम्युनिस्ट पार्टी स्थापना भएको थियो । चिनियाँ कम्युनिस्ट पार्टीले चीनमा विभिन्न राजनीतिक आरोह अवरोध पार गर्दै सन् २०४९ मा जनवादी गणतन्त्र घोषणा गरेपछि नै आजको विकसित चीन हुन पुगेको हो ।
सन् १८४० देखि १९४९ सम्म चीनले विभिन्न देशसँग युद्ध, आन्तरिक कलह, आफू र आफ्ना जनताले पाएका दुःख, अपमान र हारका इतिहास पढ्दै आएका चिनियाँहरूका लागि ७५ वर्ष सुनौलो इतिहास भएको मानिन्छ ।
त्यसैले, चिनियाँहरूले गणतन्त्र स्थापनाको ७५ औँ वर्षलाई विशेष हर्ष र खुसीका साथ मनाइरहेका छन् । आज चिनियाँ सरकारी टेलिभिजनहरूले आधुनिक प्रगतिका कथा जनतालाई देखाइरहेका छन् ।
