काठमाडौँ । नाडा अटो शो २०८१ मा नेपालको सबैभन्दा लोकप्रिय कार ब्राण्ड सुजुकीले ‘एपिक न्यू स्विफ्ट’ सार्वजनिक गर्ने भएको छ । नेपालका लागि सुजुकी ब्रान्डको आधिकारिक वितरक सीजी मोटोकर्पले यो नयाँ गाडी सार्वजनिक गर्न लागेको हो ।
चिनियाँ विद्युतीय सवारी साधनको बाहुल्यता देखिएको यो सालको नाडा अटो शोमा ईभीको खँडेरी भोगिरहेको सुजुकीले बहुसंख्यक निम्न मध्येम वर्गीय नेपालीलाई लक्षित गरेर यो कार सार्वजनिक गर्न लागेको हो । सीजी मोटोकर्पका अनुसार यो गाडी पहिलो दिनदेखि नै अटो शोमा ग्राहकहरूको लागि प्रदर्शनमा राखिने छ ।
नयाँ गाडीको मूल्य पनि अटो शोमा नै उद्घोष गर्ने तयारी कम्पनीले गरेको छ ।
स्वीफ्टको पहिलो मोडल सन् २००५ सालमा लञ्च भएको थियो । दुई दशकदेखि यो गाडी नेपाली बजारमा लोकप्रिय रहँदै आएको छ । यसको लुक्स, शक्तिशाली इन्जिन, प्रशस्त क्याबिन स्पेस र ड्राइभर–मैत्री ह्यान्डलिङका कारण नेपालमा धेरैले रुचाएका छन् ।
नयाँ एपिक स्विफ्टमा ‘जेड–सिरिज इन्जिन’ राखिएको छ । यसले उत्कृष्ट प्रदर्शन र दिगोपनाका सन्दर्भमा नयाँ आयाम थप्ने कम्पनीको विस्वास छ । नयाँ एपिक स्विफ्टमा थुप्रै आधुनिक प्रविधि र फिचरहरु समाबेश गरेको छ । जसले ग्राहकको ड्राइभिङ अनुभवलाई आरामदायी र रमाइलो बनाउने कम्पनीले जनाएको छ ।
आकर्षक एक्सटेरियर, आरामदायी क्याविन, आधुनिक सुरक्षा प्रणाली, रमाइलो ड्राइभिङ अनुभव र उन्नत प्रविधिको संयोजनबाट नयाँ स्वीफ्ट बजारमा आएको कम्पनीले जनाएको छ । क्याबिनमा ‘सेन्टर फ्लोटिङ डिजाईन’ सहितको नयाँ लेआउट छ, जसले प्रिमियम अनुभव दिन्छ ।
ड्राइभर र यात्रुहरूको सुरक्षालाई विशेष ध्यानमा राखी न्यू स्विफ्टमा विभिन्न एक्टिभ र प्यासिभ सेफ्टी फिचरहरु समावेश गरेको छ । चौँथो पुस्ताको यो स्विफ्टले तमाम गुणहरुका साथमा उत्कृष्ट माइलेज र सुरक्षा प्रबन्धहरू प्रदान गरेको छ ।
