काठमाडौँ । आगामी भदौमा हुने ‘नाडा अटो शो २०२४’ मा आधा दर्जन बैंक तथा वित्तीय संस्था सहभागि हुने भएका छन् ।
नाडा अटोमोबाइल एसोसिएसन अफ नेपालका अनुसार नबिल बैंक, ग्लोबल आइएमई बैंकसहित ५ वटा वित्तीय संस्थाले भाग लिने भएका हुन् ।
अटो शोमा नबिल, ग्लोबल आईएमई, हिमालयन, लक्ष्मी सनराइज र महालक्ष्मी विकास बैंकले स्टल बुक गरेका छन् । यसअघि भने ७ वटा बैंक तथा वित्तीय संस्थाले भाग लिने जनाएका थिए । अटो शोमा बैंक तथा वित्तीय संस्थाहरुले विभिन्न खालको गाडी खरिदको योजना ल्याउने छन् ।
विभिन्न छुटसहितको स्किममा सवारी खरिदबिक्री गरि अटो बजारलाई नै चलायमान बनाउने अपेक्षा गरिएको छ । अटो शोमा सहभागि बैंकहरुले सवारी खरिदका लागि सहज फाइनान्सिङ लगायतका सुविधा प्रदान गर्ने छन् । यद्यपि, के कस्ता स्किमहरु ल्याउँदैछन् भन्ने खुलाइएको छैन ।
अहिले विगतकाे तुलनामा बैंकहरूकाे व्याजदर घटेकाे छ । यस्ताे अवस्थामा बैंकबाट कर्जा लिएर गाडी खरिद गर्नेहरू बढ्ने अनुमान बैंकर र अटाे व्यापारीहरूले गरेका छन् ।
नाडाले यो वर्ष भदौ ११ गतेदेखि १६ गतेसम्म अटो शो आयोजना गर्दैछ । काठमाडौंको प्रदर्शनीमार्ग स्थित भृकुटीमण्डपमा नाडा अटो शोको आयोजना गर्दैैछ ।
अटो शोमा २३ वटा ब्राण्डका चारपाङ्ग्रे सवारीले सहभागिता जनाउँदैछन् । यस्तै, १३ वटा ब्राण्डका हल्का लाइट गाडी, १७ वटा ब्राण्डका दुईपाङ्ग्रे सवारी पनि सहभागि हुनेछन् । यसका साथै २७ वटा विभिन्न अटो कम्पोनेन्ट कम्पनीहरुको सहभागिता रहने नाडाले जनाएको छ ।
