- रुद्रबहादुर खड्का
चैत २०, काठमाडौँ । सूचना तथा सञ्चार प्रविधि मन्त्री रेखा शर्माले राजनीतिक परिवर्तनबाट प्राप्त भएका उपलब्धिको रक्षा र विकास गर्दै बदलिएको व्यवस्थाअनुकूल जनताको अवस्था बदल्न रेडियो नेपाल अझै विविधतापूर्ण सामग्री उत्पादन र प्रसारण गर्न आवश्यक रहेको बताइन ।
रेडियो नेपालको ७४औँ वार्षिकोत्सवको अवसरका मंगलबार सिँहदरबार स्थित रेडियो नेपालमा भएको कार्यक्रमलाई सम्बोधन गर्दै मन्त्री शर्माले २००७ सालको जनक्रान्तिको जगबाट स्थापित रेडियो नेपाल अग्रणी प्रसारण संस्था सङ्घिय लोकतान्त्रिक गणतन्त्रसम्म आइपुग्दा हरेक कालखण्डको राजनीतिक, सामाजिक, आर्थिक र सांस्कृतिक परिवर्तनको साक्षी बन्दै आएको धाराण व्यक्त गरिन ।
उनले राष्ट्र र नागरिकका हरेक सवाललाई प्रवाह गरेर रेडियो नेपालले समाजको अग्रगामी रुपान्तरणमा ऐतिहासिक भूमिका निर्वाह गर्दै आएको बताइन ।
नेपाली जनताको अथक प्रयास र सहिदको बलिदानबाट प्राप्त सङ्घिय लोकतान्त्रिक गणतन्त्रको मूल मर्मलाई आत्मसात गरी समाचार, कार्यक्रम र सन्देशहरुको माध्यमबाट गाउँ, शहर र दूरदराजका वस्तीहरुसम्म पुगी २१ औं शताब्दीको डिजिटल युग सुहाउने सूचना र सञ्चारको भरपर्दो, निष्पक्ष, स्वतन्त्र र प्रभावकारी माध्यम बन्नसक्नु आजको आवश्यकता हो । नेपाल सरकारको शतप्रतिशत भूभागमा रेडियोको पहुँच पुगेको छ ।
रेडियो नेपालले हालसम्म २२ भाषामा समाचार र २१ भाषामा कार्यक्रम प्रसारण गरेर देशको बहुभाषिक, बहुधार्मिक र बहुसाँस्कृतिक विशेषतालाई सम्बोधन गर्नु समावेशिताको महत्वपूर्ण फड्को मारेको छ ।
आगामी दिनमा रेडियो नेपाल र नेपाल टेलिभिजनलाई एकीकृत गरी सार्वजनिक प्रसारण सेवा बनाउने सरकारको नीतिलाई व्यवहारमा उतार्न सार्वजनिक प्रसारण उन्मुख समाचार र कार्यक्रम उत्पादन तथा प्रसारणका लागि तयारी गर्नुपर्ने आवश्यकता छ । यसमा कार्यरत जनशक्तिको मनोबल उच्च बनाउँदै घरघरको आवाजको रुपमा स्थापित राष्ट्रिय प्रसारण सेवा रेडियो नेपालको प्रगतिलाई अझै उचाईमा पुर्याउन व्यवस्थापन पक्षलाई मन्त्री शर्माले आग्रह गरिन ।
प्रसारणको पहुँलाई विस्तार गर्दै नयाँ प्रविधि र समय सापेक्ष विषयवस्तुहरुको प्रयोगमार्फत अब्बल प्रसारण संस्थाको रुपमा स्थापित हुन रेडियो नेपाल निरन्तर सफल रहेको मन्त्री शर्माले बताइन ।
समारोहमा स्रष्टाहरु शान्ता श्रेष्ठ र काशीराम बुढा मगरलाई जनही ५१ हजार एक रुपैँयासहित सम्मानित गरेको छ । यसैगरी साहित्यक रचनातर्फ उत्कृष्ट दाबा गुरुङ्ग, सङ्गीततर्फ उत्कृष्ट ज्योति प्रकाश, गायनतपर्फ पहिलो हुने मिलन परियार, दोस्रो हुने समिर परियार र तेस्रो हुने लेखराज ढकाललाई नगद पुरस्कार र प्रमाण पत्र प्रदान गरेको हो ।
रेडियो नेपालका कार्यकारी निर्देशक बुद्धिबहादुर केसीले वार्षिक प्रतिवेदन प्रस्तुत गर्नुभएको थियो ।
