चैत ८, काठमाडौँ । पार्टीमा गुटगत राजनीति मौलाएको भन्दै माओवादी केन्द्रीय सदस्य रामकुमार शर्माले पार्टी परित्याग गरेका छन् ।
गुटगत राजनीतिका कारण अध्यक्ष र मुख्य नेता निकटकाले मात्रै महत्त्वपूर्ण जिम्मेवारी पाएको भन्दै उनले प्रधानमन्त्रीसमेत रहेका पार्टी अध्यक्ष पुष्पकमल दाहाल ‘प्रचण्ड’ समक्ष राजीनामा पत्र बुझाएका हुन् ।
शर्माले बिहीबार समाजिक सञ्जालमार्फत् समेत आफ्नो असन्तुष्टी पोखेका छन् । आफू बफादार भएर पार्टी र देशका लागि लागे पनि पार्टीमा गुटले स्थान पाउनु र पार्टीका नेताहरू भष्ट्राचारमा मुछिनुले आफूलाई पार्टीमा बस्न उचित नलागेको उनले बताएका हुन् ।
‘प्रचण्ड ज्यूले दैनिक जसो अभिव्यक्तीमा सुशासन, समृद्धि र समाजिक न्याय को कुरा जति नै गरे पनि माओवादी पार्टीका प्रमुख पदाधिकारीहरू विभिन्न भष्ट्राचार काण्डमा संलग्न हुनु! माओवादी पार्टी, पार्टी नभएर गुटै गुटका महासंघ को रुपमा रुपान्तरण हुनु ! १० वर्षे जनयुद्ध को दौरान आफैले उठाएको मुद्दाबाट च्युत हुँदै जानु र जनादेशविपरित विदेशी शक्तिको आडभरोसामा सरकारमा रहन कै लागि पटक-पटक गठबन्धन फेरिरहने र देशलाई अस्थिरता एवं विदेशीको क्रिडास्थल बनाई अन्नत अध्यारो दिशातर्फ धकेले को महसुस गरेको छु।’ सामाजिक सञ्जालमा उनी लेख्छन्,’यस्तो अवस्थामा माओवादी पार्टीमा बसिरहन मेरो नैतिकताले दिएन तसर्थ आजकै मितिबाट म राम कुमार शर्मा नेकपा (माओवादी केन्द्र) को सम्पूर्ण जिम्मेवारी बाट राजीनामा दिएको छु।’
