काठमाडाैं । संसद्को सार्वजनिक लेखा समितिले विवादित बनेको एनसेलको शेयर खरिद बिक्री तत्काललाई रोक्न सरकारलाई निर्देशन दिएको छ । बुधवार बसेको समितिको बैठकले एनसेल खरिद बिक्री तत्काल रोक्न र ३० दिनभित्र स्वतन्त्र अनुसन्धान गर्न सरकारलाई निर्देशन दिएको हो ।
समितिले एनसेल सेयर बिक्री प्रकरणमा नियामक निकाय नेपाल दूरसञ्चार प्राधिकरणलाई पूर्व जानकारी गराउनुपर्नेमा प्रारम्भमा जानकारी नगराई अहिले आएर जानकारी गराउँछु भनेकाले पनि कानुनी व्यवस्थाको परिपालना नगरिएको ठहर गरेको छ ।
समितिले एनसेलको सेयर खरिद बिक्रीबारे भएका प्रक्रिया ४८ घण्टाभित्र सार्वजनिक गर्न पनि सरकारलाई निर्देशन दिएको छ । समितिले आगामी दिनमा दुबिधा नहुने गरी दूरसञ्चार कानुन संशोधन गर्नुपर्ने भएको निष्कर्ष पनि निकालेको छ ।
त्यसका लागि आगामी संसद् अधिवेशनमा कानुन संशोधन विधेयक संसदमा दर्ता गर्न निर्देशन दिएको छ । ‘प्रत्यक्ष वैदेशिक लगानी अन्तर्गत एनसेलबारे थप धारणा बुझ्न प्रधानमन्त्रीलाई समितिको अर्को बैठकमा आमन्त्रण गर्ने निर्णय गरेको छ’, समितिको निर्णयमा भनिएको छ ।
