जसपा नेता रौनियार लगायत नेताकार्यकर्ता एमालेमा
पर्सा । नेकपा (एमाले)का अध्यक्ष केपी शर्मा ओलीले मुलुकलाई समृद्धिको मार्गमा अघि बढाउन एमालेको एकल बहुमतको सरकार अपरिहार्य भएको बताउनुभएृको छ ।
नेकपा (एमाले) पर्साद्वारा आज पोखरियामा आयोजित जनसभामा अध्यक्ष ओलीले ‘समृद्ध नेपाल, सुखी नेपाली’को परिकल्पना साकार गर्न एमालेको एकल बहुमतको सरकार आवश्यक भएको बताउनुभयो ।
उहाँले आगामी निर्वाचनमा नेकपा (एमाले)लाई बहुमत प्राप्त हुनेगरी आ–आफ्नो क्षेत्रबाट इमानदारीपूर्वक काम गर्न पार्टीका नेता कार्यकर्तालाई निर्देशन दिनुभयो ।
अध्यक्ष ओलीले एमाले र आफूले नेतृत्व गरेको सरकारका समयमा भएको विकास र अहिले पनि एमालेका जनप्रतिनिधिहरूले नेतृत्व गरेको स्थानीय तहहरूको विकास हेर्दा नेकपा (एमाले)ले मात्र देशको विकास गर्ने कुरा पुष्टि भएको बताउनुभयो ।
उहाँले आफ्नो प्रधानमन्त्रीत्वकालमा पूर्वाधार विकासको क्षेत्रमा उल्लेखनीय काम गरेको र विश्वमा छिटो विकास गरेका १० देशको सूचीमा नेपाललाई पार्न सफल भएको बताउनुभयो ।
अहिले नेपाल विश्वमा सबैभन्दा कम विकास गरेको देशको सूचीमा रहेको भनाइ अध्यक्ष ओलीले राख्नुभयो ।
उहाँले रामको जन्म नेपालमा भएको धारणा राख्नुभयो । भारतको अयोध्यामा रामको जन्म भएको कुनै इतिहास र प्रमाणहरू फेला नपरेको तर नेपालकै अयोध्यापुरीमा रामको जन्म भएको विभिन्न अध्ययन अनुसन्धानले देखाएको बताउनुभयो ।
मधेसमा विकास गर्ने एमाले नै भएको भन्दै पूर्वप्रधानमन्त्री ओलीले मधेसमा विकासको मेरुदण्डको रूपमा रहेको हुलाकी सडक निर्माणको काम एमाले सरकारकै पालामा भएको बताउनुभयो ।
अध्यक्ष ओलीले केही राजनीतिक दलले जातिको कुरा गरेर जनतालाई भिडाउने काम गरिरहेको बताउँदै जातको नभएर परिवर्तन, विकास, एकता र देशको कुरा गर्नुपर्नेमा जोड दिनुभयो ।
आफ्नो स्वार्थ पूर्तिका लागि जनतालाई भिडाउने काम एमालेले नगर्ने बताउँदै उहाँले भन्नुभयो– एमाले सबैलाई एकताबद्ध गरेर राष्ट्र निर्माण गर्ने अभियानमा लागेको छ ।
अध्यक्ष ओलीले विभिन्न भ्रमहरूबाट मुक्त भई राष्ट्र निर्माणको अभियानमा लाग्न आह्वान समेत गर्नुभयोे ।
कार्यक्रममा जसपा नेपालका नेता एवं पूर्व प्रतिनिधिसभा सदस्य हरिनारायण रौनियार, लोकतान्त्रिक समाजवादी पार्टीकी नेतृ मुन्नी श्रीवास्तव, नेपाल सुशासन पार्टीकी केन्द्रीय सदस्य विनादेवी बैठा, धोविनी गाउँपालिकाका पूर्व अध्यक्ष सुरेश पटेलसहित सयौं ब्यक्तिहरू नेकपा (एमाले)मा प्रवेश गरेका छन् ।
नवप्रवेशीहरूलाई स्वागत गर्दै अध्यक्ष ओलीले सबैले पार्टीमा स्थान पाउने बताउनुभयो ।
कार्यक्रममा नव प्रवेशी रौनियारले देशको विकास र समृद्धि नेकपा (एमाले) र त्यसका अध्यक्ष केपी शर्मा ओलीको नेतृत्वमा मात्र सम्भव देखेर आफू एमालेमा प्रवेश गरेको बताउनुभयो ।
नेकपा (एमाले) पर्साका संयोजक डाक्टर विश्वम्भर शर्माको अध्यक्षतामा भएको कार्यक्रममा नेकपा (एमाले)का सचिव एवं मधेश प्रदेश इन्चार्ज योगेश भट्टराई कोशी प्रदेशका इन्चार्ज रघुवीर महासेठ पोलिटब्यूरो सदस्य पुरुषोत्तम पौडेल, अच्यूत मैनाली, ज्वाला कुमारी साह, सुमन प्याकुरेल, केन्द्रीय सदस्यहरू प्रभु हजरा, अरविन्द कुमार सिंह, राजकुमार गुप्ता, निर्मला देवकोटा, मधेश प्रदेशका पदाधिकारी तथा सदस्यहरू, सल्लाहकार समितिका सदस्यहरू लगायतको सहभागिता रहेको थियो ।
