काठमाडौं । १९औं एसियाली खेलकुदमा नेपालकी एरिका गुरुङ स्वर्णपदक जित्नबाट चुकेकी छन् । उनले एसियाली खेलकुदको इतिहासमै पहिलोपटक नेपाललाई स्वर्ण पदक दिलाउनबाट चुकेकी हुन् ।
चीनको हान्जाउमा केहीबेरअघि सकिएको करातेको महिला ६८ किलो तौल समूहको फाइनलमा एरिका कजाकस्तानकी वेरुल्त्सेवा सोफियासँग ३-० ले पराजित भइन् ।
एरिका एसियाली खेलकुदमा रजतपदक जित्ने दोस्रो खेलाडी बनेकी छन् । यसअघि, रजत पदक व्यक्तिगत रूपमा तेक्वान्दोकी सविता राजभण्डारीले मात्रै जितेकी थिइन ।
टिम इभेन्टमा प्याराग्लाइडिङमा रजत पदक आएको थियो । एसियाली खेलकुदको इतिहासमै नेपालले जितेको यो तेस्रो रजतपदक हो ।
एरिकाले हङकङकी हो काइ यानलाई ८-४ ले हराउँदै फाइनलमा स्थान सुरक्षित गरेकी थिइन ।
जारी एसियाली खेलकुदमा यो नेपालको दोस्रो पदक हो । यसअघि, कबड्डीमा नेपालले कांस्यपदक जितेको थियो ।
