काठमाडाैं । ललितपुरमा प्रेमिको घरमा गएकी किशोरीको मृत्यु भएपछि किशोर उमेरकै उनका केटासाथी पक्राउ परेका छन्।
ललितपुरको महालक्ष्मी नगरपालिका-३ बोझेपोखरी घर भएकी करिब १८ वर्षीया किशोरीको मृत्यु भएपछि उनका प्रेमी ललितपुरकै इमाडोलका १८ वर्षीय आर्यन पाण्डेलाई पक्राउ गरिएको जिल्ला प्रहरी परिसर ललितपुरले जनाएकाे छ ।
प्रहरीको प्रारम्भिक अनुसन्धानको क्रममा उनीहरू प्रेमिप्रेमिका रहेको खुलेको छ । किशोरीको मृत्युपछि किशोरलाई हामीले पक्राउ गरेका छौँ। किशोरीको शव पोस्टमार्टमको लागि त्रिवि शिक्षण अस्पताल महाराजगञ्जमा राखिएको जनाइएकाे छ । किशोरसँगै हुँदा बेहोस भएकी किशोरीलाई बुधबार दिँउँसाे उपचारको लागि ग्वार्कोस्थित किष्ट अस्पताल लगिएको थियो। त्यहाँ पुर्याउँदा चिकित्सकले उनको पहिल्यै मृत्यु भइसकेको पुष्टि गरेका थिए।
प्रहरीका अनुसार ती किशोरी बुधबार दिउँसो करिब १२ बजेतिर इमाडोल बस्ने आफ्ना प्रेमी पाण्डेको घरमा गएकी थिइन्।
सामाजिक सञ्जालमार्फत चिनजान भएपछि उनीहरु केही महिनायता प्रेम सम्बन्धमा रहेको प्रहरीको प्रारम्भिक अनुसन्धानमा खुलेको छ। प्रेम सम्बन्ध बढ्दै गएपछि उनीहरूले भेट्ने सल्लाह गरेका थिए। त्यसपछि किशोरी पहिलोपटक प्रेमीको घर पुगेकी थिइन्।
बुधबार दिउँसो दुईजना कोठामा बसिरहँदा किशोरी एक्कासी बेहोस भएको किशोरले प्रहरीलाई जानकारी गराएका छन्। बेहोस भएपछि ती किशोरले आफ्ना बुबालाई खबर गरेका थिए।
खबर गरेपछि पुगेका किशोरका बुवाले किशोरीलाई किष्ट अस्पताल पुर्याउँदा चिकित्सकले मृत घोषणा गरेका प्रहरीले जनाएको छ। अस्पतालका चिफ अपरेटिङ अफिसर अमिस पाठकले उनको पहिल्यै मृत्यु भइसकेको पुष्टि गरेका हुन्।
