काठमाडौं । भदौ २१,भदौ २६ गते देखि हुने नाडा अटोशोमा लग्जरी इभि मोडल बीवाईडी सिल देखिने भएको छ । गत जनवरीमा दिल्ली अटोशोमा यो गाडी प्रदर्शन गरिएको थियो । भारतमा देखिएको आठ महिनापछि नेपालकै ठूलो अटोशो नाडा अटोशोमा प्रदर्शन हुने भएको हो ।
कम्पनीले बुधबार एक विज्ञप्ति जारी गर्दै बीवाईडी सिल नेपाल भित्रिएको जानकारी दिएको छ ।
नेपालका लागि बीवाईडी गाडीको आधिकारीक वितरक साइमेक्स इंकले हालै नाडा अटोशोका लागि नेपाल भित्र्याएको बीवाईडी सिल ल्याएको जनाएको छ । लग्जरी विद्युतीय गाडी बीवाईडी सिल लामो समयदेखि नेपालमा प्रतिक्षा गरिएको थियो ।
बिहिबार जारी गरेको सूचनामा साइमेक्स इंकले बीवाइडी सिलको मुल्य एक करोड ५ लाख तोकेको छ । चीनमा उत्पादन हुने यस सिल सेडानमा कम्पनीले ६१.४ किलोवाट आवर र ८२.५ किलोवाट आवर गरि दुई ब्याट्री अप्सन दिएको छ । तर, नेपालमा भने आएको सिल ८२.५ किलोवाट आवरको रहेको जनाइएको छ ।
बीवाईडी सिलले एक पटकको चार्जमा ५७० किलोमिटर रेन्ज दिन्छ । डबल मोटर सहितको यो गाडीमा ३८९ किलोवाटको मोटर दिइएको छ । यो गाडीले ३।८ सेकेन्डमा शून्यदेखि १०० किलोमिटर प्रति घण्टाको गतिमा गुड्छ ।
सेडानमा रहेको मोटर कन्फिगरेसनमा रियर ह्विल ड्राइभ अप्सनमा २०४ ब्रेक हर्स पावर प्रदान गर्छ र अल ह्विल ड्राइभ अप्सनमा ५३० ब्रेक हर्स पावर र ६७० एनएम टर्क उत्पादन गर्छ । सिलमा दिइएको डिसी चार्जरले २५ मिनेटमै ८० प्रतिशत र एसी चार्जरले सात घण्टामा चार्ज हुन्छ ।
ग्राउन्ड क्लियरेन्स १५० एमएम, टप स्पीड १८० किलोमिटर प्रतिघण्टा लगायतका बिशेषता गाडीमा छन ।
