काठमाडौँ, श्रावण १५ , प्रतिनिधिसभाअन्तर्गतको सार्वजनिक लेखा समितिले क्विन्टल सुन तस्करीको छानबिनका लागि उच्चस्तरीय समिति गठन गर्न सरकारको ध्यानाकर्षण गराएको छ । त्रिभुवन अन्तर्राष्ट्रिय विमानस्थलबाट अर्बौंको सुन तस्करी हुँदा करोडौंको राजस्व गुमेकाले समितिको क्षेत्राधिकार आकर्षक भएको निष्कर्ष निकाल्दै लेखाले सरकारलाई उच्चस्तरीय समिति गठन गरी छानबिन गर्न ध्यानाकर्षण गराएको हो ।
समितिको आइतबारको बैठकले ठूलो परिमाणको सुन तस्करीले अन्तर्राष्ट्रियस्तरमै नेपालको साख धमिल्याउने काम गरेकाले सत्यतथ्य पत्ता लगाउन र कारबाही गर्नका लागि उच्चस्तरीय समिति गठनमा जोड दिएको हो । समितिको सभापतित्व गरिरहेका ज्येष्ठ सदस्य अर्जुननरसिंह केसीले भने, ‘केही दिनपहिले त्रिभुवन अन्तर्राष्ट्रिय विमानस्थलबाट गैरकानुनी रूपमा भित्रिएको सुन तस्करीको स्वतन्त्र र निष्पक्ष छानबिन गर्न अधिकारसम्पन्न एक उच्चस्तरीय छानबिन समिति गठन गर्न नेपाल सरकारलाई ध्यानाकर्षण गराउने निर्णय भएको छ ।’
नेपालका भन्सार नाकाहरूमा हुने गतिविधिप्रति अर्थमन्त्री र अर्थ सचिव जवाफदेही नभएकाले त्यसबारे पनि छानबिन हुनुपर्ने केसीले बताए । समिति बैठकमा सत्तापक्ष र प्रतिपक्षका सांसदले उच्चस्तरीय छानबिन समिति माग गरेका थिए । एमाले सांसद योगेश भट्टराईले सुन तस्करीमा उपप्रधान तथा गृहमन्त्री नारायणकाजी श्रेष्ठ र अर्थमन्त्री प्रकाशशरण महतमाथि पनि छानबिन गर्नुपर्ने भएकाले उच्चस्तरीय छानबिन समिति गठन हुनुपर्ने बताएका थिए । ‘प्रहरीले गृहमन्त्रीमाथि छानबिन गर्न सक्दैन । फाइल उहाँको टेबुलमा छ, सरकारमै सहभागी दलको ठूलो नेता तानिएका छन् तर सरकार छानबिन गर्न चाहँदैन,’ उनको माग थियो, ‘भन्सारका गडबडीबारे छानबिन गर्नुपर्नेछ, त्यहीं अर्थमन्त्री बसेर छानबिन हुन्छ रु’ उनले सुनमा लगाइएको पैसाबारे पनि आशंका रहेको बताएका थिए ।
एमालेकै ऋषिकेश पोखरेलले पनि सुन प्रकरणको छानबिन गर्न उच्चस्तरीय समिति गठन गर्नुपर्ने माग राखे । कांग्रेस सांसद सञ्जय गौतमले तस्करी र भ्रष्टाचार प्रकरणको छानबिनमा सार्वजनिक लेखा समिति संलग्न हुनुपर्ने माग गरे । ‘नेपाल तस्करको स्वर्णभूमि बनिसकेको रहेछ तर हामी यसलाई टुलुटुलु हेरेर बसेका छौं, मुलुकको साख खस्यो, हामीलाई मुख देखाउनै गाह्रो भयो,’ उनले भने, ‘भ्रष्टाचार, सुन, भुटानी शरणार्थी, ललिता निवास चाहे जुनसुकै भ्रष्टाचार काण्डमा हामी अन्तिमसम्म पुग्नुपर्छ ।’
सत्तारूढ दल जसपाका प्रदीप यादवले पनि लेखा समितिले तस्करी प्रकरणको छानबिन गर्नुपर्ने बताएका थिए । कांग्रेसकै रामकृष्ण यादवले समितिमा गृहमन्त्री र अर्थमन्त्रीलाई बोलाएर सुन तस्करीका विषयमा जानकारी लिनुपर्ने माग राखे । सांसद राजेन्द्र केसीको भनाइ थियो, ‘यो पटक त सुन फेला पर्यो, मान्छे पनि फेला परे तर ३३ किलो सुनकाण्डका मान्छे सबै जेलमा छन्, प्रमाणको रूपमा रहेको सुन कहाँ छ, थाहा छैन । अहिले सुन फेला परेको छ, यो आफैंमा उपलब्धि हो । यसमा सम्बन्धित मन्त्रीहरूलाई बोलाएर छलफल गर्नुपर्छ ।’ गृहमन्त्री र अर्थमन्त्रीलाई बोलाएर सोधपुछ गर्न लेखा समिति अग्रसर हुनुपर्ने केसीको भनाइ थियो ।
त्रिभुवन अन्तर्राष्ट्रिय विमानस्थलबाट साउन ३ मा राजस्व अनुसन्धान विभागले स्कुटरको ब्रेक सुमा प्याक गरिएको सुन बरामद गरेको थियो । उक्त सुनको परिमाण एक क्विन्टल रहेको बताइएको छ । विमानस्थलबाट तस्करीको सुन हालसम्मकै ठूलो परिमाण भएको बताइएको छ । उक्त प्रकरणमा चीन, नेपाल र भारतका तस्कर समूह संलग्न रहेको अनुमान गरिएको छ भने संलग्न केही पक्राउ पनि परेका छन् । संसद्मा प्रमुख प्रतिपक्षी एमालेले उक्त प्रकरणको छानबिनका लागि उच्चस्तरीय समिति बनाउनुपर्ने भन्दै साउन १० को प्रतिनिधिसभा बैठक कारबाही अवरुद्ध गरेको थियो ।
