काठमाडौं । बजारमा माग घटेको भन्दै खाने तेलको मूल्य घटेको छ ।
रुस–युक्रेन युद्धको वाहानामा कच्चा पदार्थ आयात प्रभावित भएको भन्दै खानेतेलको मूल्य कार्टुनमा ३ हजारमाथि पुगेको थियो । बजारमा मन्दी छाएपछि हाल खाने तेलको मूल्य कार्टुनमा २ हजारभन्दा तल आइपुगेको छ ।
अत्यधिक खपत हुने तोरी तेलको मागमा कमी आउँदा मूल्यमा गिरावट अएको जनाइएको छ । तोरी तेल ब्राण्डअनुसार लिटरमा २० देखि ११० रुपैयाँसम्म घटेको छ । पहिले प्रतिलिटर ३६० रुपैयाँ प्रतिलिटर रहेको धारा तेल अहिले २५० रुपैयाँ पर्छ । अन्य ब्राण्डका तेलहरु लिटर २५० रुपैया पर्न थालेको छ।
मूल्य घट्दा उद्योगी र कारोबारीको व्यापारमा नाफा प्रभावित भए पनि उपभोक्तालाई भने राहत भएको छ। उपभोक्ताले डेढ वर्ष अघिको मूल्यमा तेल खरिद गर्न पाएका छन्। पछिल्लो केही समयदेखि खानेतेलको मूल्य क्रमिक घट्दै आएको थियो।
अन्तर्राष्ट्रिय बजारमा कच्चा पदार्थ आपूर्ति हुन थालेसँगै घटेको मूल्यलाई अहिले मागमै आएको गिरावटले प्रभावित पारेको उद्योगीहरुले बताएका छन्। बजार मागमा कमी आउँदा उद्योगहरुले उत्पादन घटाउन सुरु गरेका छन्। खुद्रा बिक्रेताबाट अर्डर घट्न थालेसँगै थोक बिक्रेताले उद्योगहरुबाट उठाउने परिमाण घटाएका छन् ।
हाल तेलको नयाँ मूल्य सूर्यमुखी प्रतिलिटर १९५ रुपैयाँ र भटमासको तेल प्रतिलिटर १९० रुपैयाँ छ । यसअघि उक्त तेल प्रतिलिटर २१० रुपैयाँभन्दा बढी थियो। उपभोक्ताले ठूलो परिमाणमा खरिद गर्न सक्ने अवस्था नभएकाले उत्पादित तेल स्टक बस्न थालेको जानाइएको छ ।
