काठमाडाैं । सरकारले नेपाली नागरिकलाई रुस जान कडाइ गर्न थालेको छ । रुस–युकेन युद्धमा खटिने गरी नेपाली नागरिकहरू रुसी सेनामा भर्ती भएको खबरपछि प्रधानमन्त्रीको निर्देशनमा कडाइ गर्न थालिएको हो ।
प्रधानमन्त्री कार्यालयका अनुसार दुई देशबिच सम्झौता भएका विद्यार्थीबाहेक भिजिट भिसामा जाने, अरु ढंगले जाने सबैलाई कडाइ गरिएको जानकारी दिए । जसअनुसार सरकारले मातहतका निकायलाई सर्कुलर गरेको र सोहीअनुसार विमानस्थलमा कडाइ गरिएको जनाएकाे छ ।
सरकारले परराष्ट्र मन्त्रालयमार्फत रुसलाई त्यहाँको सेनामा नेपाललाई भर्ती नगर्न कूटनीतिक नोट पठाइसकेको छ भने भर्ना भएकाहरूलाई पनि फिर्ता पठाउन आग्रह गरिएको छ ।
रुसी सेनामा भर्ना भएर नेपाली समस्यामा परेको खबरपछि सरकारले यस प्रकरणलाई गम्भीरतापूर्वक छानबिन गरिरहेको छ । सोहीअनुसार रुसमा नेपाली पठाउने कार्यमा संलग्न व्यक्तिहरू धमाधम समातिन थालेका छन् । हालसम्म १७ जना एजेन्टहरू पक्राउ परेको प्रहरीले जनाएको छ । प्रहरीका अनुसार यसबारे अनुसन्धान भइरहेकाले अवैध ढंगले नेपालीलाई रुस पठाएर सेनामा भर्ती गराउने कार्यमा संलग्न अन्य पनि छिटै पक्राउ पर्ने बताएको छ ।
प्रधानमन्त्री अनुसार रुसी सेनामा करिब २०० नेपाली कार्यरत रहेको औपचारिक रिपोर्ट प्राप्त भएको छ । रुसी सेनामा भर्ना भएका नेपाली युवाहरूलाई सकुशल फिर्ता गर्न सरकारले हर सम्भव प्रयास गरिरहेको प्रचण्डको भनाइ थियो ।
बुधवार काभ्रेको धुलिखेलमा काठमाडौँ विश्वविद्यालयको २९ औँ दीक्षान्त समारोहमा प्रधानमन्त्रीले भनेका थिए, ‘अहिले विभिन्न बाध्यताका कारण २०० भन्दा बढी नेपाली युवाहरू रुसी सेनामा भर्ना भएको जुन खबर आएको छ, त्यो चिन्ताजनक छ र सरकार तिनलाई सकुशल फिर्ता ल्याउन हर सम्भव प्रयास गरिरहेको छ।’ नेपालमा अवसर छैन भन्ने भाष्य निर्माणको परिणामस्वरूप नेपाली युवा विदेशमा अनेक हन्डर खान बाध्य भएको प्रधानमन्त्रीको भनाइ थियो ।
रुसी सेनामा भर्ना भएका ६ नेपालीको युद्धका क्रममा मृत्यु भएको परराष्ट्र मन्त्रालयले केही दिनअघि विज्ञप्तिमार्फत जानकारी दिएको थियो ।
