काठमाडौं । कार्तिक ६, विजया दशमीको टीकाको उत्तम साइत बिहान ११ बजेर २ मिनेटमा रहेको जनाइएको छ।
नवरात्रको मुख्य दिन अर्थात दशमीको दिन मंगलबार दिनभर टीका र जमरा लगाउन सकिने नेपाल पञ्चाङ्ग निर्णायक विकास समितिले जनाएको छ। तथापि टीका प्रसाद ग्रहण गर्न साइत खोज्नेका लागि मंगलबार बिहान ११ बजेर २ मिनेटको साइत उत्तम रहेको समितिको भनाइ छ।
विजयादशमी आफैंमा शुभ दिन भएकाले दिनभर साइत खोज्नु नपर्ने मान्यता रहेको छ। त्यस्तै, बिहान १०ः३७ बजे देवी बिसर्जनको साइत रहेको समितिले जनाएको छ।
घटस्थापनाका दिन स्थापना गरिएको घडाबाट वैदिक विधिपूर्वक अभिषेक गरी विजयादशमीको टीका लगाइन्छ। आश्विन शुक्ल दशमीका दिनमा मनाइने विजयादशमी पर्व हर्षोल्लासका साथ मान्यजनबाट दुर्गा भवानीको प्रसादस्वरूप टीका, जमरा थापेर मनाइन्छ। दशैंका दिन नभ्याउनेले कोजाग्रत पूर्णिमासम्म मान्यजनबाट टीका ग्रहण गर्ने प्रचलन रहेको छ।
मान्यजनबाट दुर्गाको प्रसादका रूपमा टीका ग्रहण गर्दा अन्य फूलका साथै घटस्थापनाका दिनमा वैदिक विधिपूर्वक राखिएको पहेँलो जमरालाई समृद्धिको प्रतीकको रूप मानी लगाउने गरिन्छ। असत्यमाथि सत्य र आसुरीशक्तिमाथि दैवी शक्तिको विजयको प्रतीकका रूपमा मनाइने विजयादशमी बडादशैंको सबैभन्दा महत्त्वपूर्ण दिन हो।
त्रेता युगमा भगवान् रामले असत्यको प्रतीक बनेका रावणमाथि विजय प्राप्त गरेकाले त्यही समयदेखि विजयादशमी मनाउन शुरु गरिएको धार्मिक विश्वास छ। यसैले दशैंको दिनलाई विजयको प्रतीकका रूपमा पनि लिइन्छ।
