काठमाडौं । काठमाडौंमा पछिल्लो तीन दिनमा जिउँदो ब्रोइलर कुखुराको मासुको मूल्य किलोमा २० रुपैयाँले घटेको छ ।
असार २५ गते किलोमा १० रुपैयाँले घटेको मासुको कोल्ड स्टोर (जिउँदो कुखुरा) मूल्य बुधबार पुनः १० रुपैयाँले सस्तो भएको राष्ट्रिय कुखुरा बिक्री व्यवसायी संघले जनाएको छ ।
यो मूल्य काठमाडौं उपत्यका र यसका वरपरका क्षेत्रको हो ।
पछिल्लो पटक मूल्य घटेपछि ब्रोइलर कुखुराको कोल्ड स्टोर मूल्य २९० रुपैयाँ कायम भएको जनाइएको छ । यसअघि ब्रोइलर कुखुराको कोल्ड स्टोर मूल्य ३१० रुपैयाँसम्म पुगेको थियो ।
ब्रोइलरको कोल्ड स्टोर मूल्य घटेसँगै अब तयारी कुखुराको मासुको मूल्य पनि घट्ने संघले जनाएको छ ।
अहिले बजारमा ४६० रुपैयाँ प्रतिकिलो सम्ममा तयारी ब्रोइलरको कुखुराको मासुको बिक्री भइरहेको छ ।
जिउँदो कुखुराको उत्पादन बढेको र भारतबाट पनि अवैध मात्रामा कुखुरा भित्रिएका कारण मूल्य घटेको संघको दाबी छ ।
यद्यपी, साउन महिनामा हिन्दुहरुले माछा तथा मासु बार्ने चलन भएका कारण पनि बजारमा मासुकाे खपत थोरै हुने गर्दछ । माग घटेपछि बस्तुको मुल्य घट्ने बजारको नियम त छदैछ ।
काठमाडौं उपत्यका दैनिक करिब ५ लाख किलो मासुको खपत हुन्छ ।
