काठमाडौं । पत्रकारकाे सुरक्षा र प्रेस तथा अभिव्यक्ति स्वतन्त्राको रक्षाका लागि क्रियाशिल संस्था नेपाल पत्रकार महासंघकै उजुरीमा फोटो पत्रकार तथा अभियन्ता अदीप्त गिरिविरुद्ध पक्राउ पुर्जी जारी भएको छ ।
इकान्तिपुरका अनुसार पत्रकार तथा सञ्चारकर्मीहरूमाथि सामाजिक सञ्जालमार्फत टिप्पणी गरेको आरोपमा नेपाल पत्रकार महासंघ, पर्वत जिल्ला अध्यक्ष, निवर्तमान अध्यक्ष र कार्यवहाक अध्यक्षसहित सात पत्रकारले दिएको उजुरीका आधारमा जिल्ला अदालत पर्वतले संस्कृतिकर्मी एवं फोटो पत्रकार आरके अदीप्त गिरीविरुद्ध पक्राउपुर्जी जारी गरेको छ ।
कालीगण्डकी बचाउ अभियानका अभियन्ता तथा पत्रकार गिरीविरुद्ध प्रहरीले पक्राउ पुर्जी जारी गरेकोमा विरोध भएको छ । कालीगण्डकी दोहनको विषयमा पत्रकारदेखि विभिन्न क्षेत्रका व्यक्तिको मिलेमतो रहेको भन्दै फेसबुकमा आलोचना गरेका आधारमा उनीविरुद्ध पर्वत प्रहरीले पक्राउ पुर्जी जारी गरेको हो । गिरीविरुद्ध पक्राउ जारी भएकोमा अभियन्ता तथा पत्रकारले नै विरोध गरेका छन ।
जिल्ला प्रहरी कार्यालय पर्वतले उनीविरुद्ध विद्युतीय कारोबार ऐनअनुसार पक्राउ पुर्जी जारी गरेको हो । पत्रकारहरूको किटानी जाहेरीका आधारमा जाहेरी दर्ता गरी अदालतबाट पक्राउ अनुमति लिइएको पर्वत प्रहरीले जनाएको छ ।
गिरीले कसैको नाम नलिई पत्रकारहरूको आलोचना गरेका थिए । नदी दोहान गर्ने गिरोहसँग मिलेको उनको आरोप थियो । पत्रकार गिरीले कालीगण्डकी दोहनविरुद्ध संघर्ष गर्दै आएका छन ।
