नुवाकोट, मंसिर २४ गते । नेकपा (एमाले) का अध्यक्ष तथा पूर्व प्रधानमन्त्री केपी शर्मा ओलीले नेपालका बैंंकहरू मिटरब्याजीजस्तो हुन नहुने बताउनुभएको छ । आइतवार झुलाघाट–चिवाभञ्ज्याङ यात्रा अन्तर्गत नुवाकोटमा आयोजित कार्यक्रममा अध्यक्ष ओलीले यस्तो बताउनुभएको हो ।
बैंकले निर्मम साहु, मिटरब्याजी तरिकाले नभएर विकासका लागि सहयोगी र अनकुल संस्थाको रुपमा काम गर्न आवश्यक रहेको उहाँले बताउनुभयो । बैंकले जुन शर्तमा व्यवसायीलाई ऋण दिएको हो, त्यो शर्त पालना गर्न आवश्यक रहेको उहाँले बताउनुभयो । बैंक र ऋणहरुबीच ब्याजदरलगायतका विषयमा शर्त पालना नभएर दुवैपक्षबीचको सहमतिमा ब्याजदर घटबढ गर्नुपर्ने उहाँको सुझाव छ ।
उहाँले पछिल्लो समय बैंक र ऋणीबीचको सहमतिमा ब्याजदर घटबढ गर्ने नियमावलीमा लेखिएको भए पनि घट्ने हुँदै नहुने तर बढ्ने मात्र भइरहेको टिप्पणी गर्नुभयो । बैंकले एकलौटी ब्याज बढाउन नपाउने व्यवस्था गर्नुपर्ने उहाँको सुझाव छ । अध्यक्ष ओलीले बैंकहरुले कर्जाको ब्याजदरलाई सिङ्गल डिजिटमा ल्याउनु पर्ने बताउनुभयो । उहाँले अफ्ठ्यारोमा परेका व्यवसायीलाई केही समयका लागि म्याद थप गरेर उद्यम व्यवसाय सहयोग गर्न आग्रह गर्नुभयो ।
बैंकहरुले व्यवसायीको व्यवसाय डुब्न लाग्यो भने सहायता गरेर त्यसलाई थप ऋण दिएर उठाउने र आफ्नो ऋण लिने अवस्था सिर्जना गर्नुपर्ने अध्यक्ष ओलीले सुझाव दिनुभयो । अध्यक्ष ओलीले अफ्ठ्यारोमा परेको बेला ऋणीहरुको गज्जबको जग्गा रहेछ भन्दै लिलामीमा राख्ने तरिका उपयुक्त नभएको बताउनुभयो । उहाँले बैंकमा ऋण लिनेहरू फालाफाल भएकाले अहिले बैंकले ऋण लिनेको महत्व बुझ्न नसकेको बताउनुभयो । बैंक र ऋणीहरुको सम्बन्ध तनावको रुपमा नभइ सुमधुर हुन आवश्यक रहेको अध्यक्ष ओलीले चर्चा गर्नुभयो ।
उहाँले भन्नुभयो, ‘बैंकबाट जुन शर्तमा ऋण दिएको छ त्यो शर्त पालना हुनुपर्छ । एकलौटी बढाउन नपाउने व्यवस्था हुनुपर्छ । अहिलेको अवस्थामा ऋणको ब्याजलाई सिङ्गल डिजिटमा ल्याउनुपर्छ ।’ बैंकले निर्मम साहुजी होइन, मिटरब्याजी तरिका होइन, बैंकले विकासको लागि सहयोगी र अनुकुल संस्थाको रुपमा काम गर्नुपर्ने उहाँले सुझाव दिनुभयो ।अध्यक्ष ओलीले वर्तमान सरकारले सार्वभौम सत्ताको सम्मान गर्न नसकेको टिप्पणी गर्नुभयो । उहाँले आफू प्रधानमन्त्री भएको बेला बनाएको पोखरा विमानस्थलमा वर्तमान सरकारले उडान भर्न नसकेको भन्दै आपत्ति जनाउनुभयो ।
पोखराजस्तै भैरहवा विमानस्थलमा समेत वर्तमान सरकारले जहाज उडाउन नसकेको चर्चा गर्दै अध्यक्ष ओलीले त्यसको व्यवस्थापन गर्न सरकारसँग आग्रह गर्नुभयो । अध्यक्ष ओलीले नेपाल विकासमा फड्को मार्न चाहेकाले जसले सस्तोमा बनाइ दिन्छ उसैलाई आयोजना बनाउन दिनुपर्ने बताउनुभयो ।
