काठमाडौं । सञ्चार रजिष्ट्रार कार्यालय बागमती प्रदेशले आइतवार काठमाडौ उपत्यका कार्यालय जावलाखेलमा आयोजना गरेको बिद्युतीय सामग्रीको स्वनियमन र सामाजिक उत्तरदायित्व बिषयक अन्तरक्रियात्मक कार्यक्रममा यस क्षेत्रमा क्रियाशिल जनशक्तिलाई सामाजिक उत्तरदायित्वलाई ख्याल गरी स्वनियमनमा प्रोत्साहित गरेको छ ।
बागमती प्रदेश आन्तरिक मामिला तथा कानुन मन्त्री गंगानारायण मन्त्री श्रेष्ठले प्रविधिको बिकाससँगै भित्रिएको बिकृति र बिसंगतिले समाजमा व्याप्त अराजकता भाइरसको रुपमा रहेको बताउनुभयो । उहाँले त्यस्तो भाईरस हटाउन कानूनलाई प्रभावकारी कार्यान्वयन गर्न सक्नु पर्ने बताउनुभयाे ।
सञ्चार रजिष्ट्रार रेवती प्रसाद सापकोटाले बिद्युतीय सञ्चार माध्यममा पस्किने सामग्रीलाई मर्यादित र शिष्ट बनाउन त्यस्ता सामग्री उत्पादकलाई सीप र क्षमता बिकासमा प्रोत्साहित गर्न प्रदेश सरकार तयार रहेको बताउनुभयो । उहाँले स्वतन्त्रताका नाममा अराजकता मच्चाउने छुट कसैलाई नभएको भन्दै पत्रकारिताको मूल्य र मान्यता भित्र रहेर पत्रकारिता गर्न चाहनेलाई आवश्यक सीप उपलब्ध गराउन बताउनुभयो ।
नेपाल प्रहरीको साइबर व्यूरोमा पुग्ने उजुरीका ९५ प्रतिशत उजुरी मानहानी र गाली व्यइजतिसँग सम्बन्धित रहेको प्रहरी नायव उपरिक्षक इन्जिनियर दिपेश जोशीले जानकारी गराउनुभयो ।
कार्यक्रममा पत्रकार उमेश श्रेष्ठ र जीवन भण्डारीले कार्यपत्र प्रस्तुत गर्नु भएको थियो ।
कार्यपत्रमाथी टिप्पणी गर्दै बरिष्ठ पत्रकार ध्रबहरि अधिकारीले स्वनियमन निर्देशिका लागू गराएर डिजिटल मिडिया सञ्चालकहरुलाई प्रशिक्षित गरेमा पनि धेरै विकृति कम हुने विश्वास व्यक्त गर्नुभयो ।
