काठमाडौं । कान्तिपुर पब्लिकेसन्सका अध्यक्ष कैलाश सिरोहियालाई म्याद थपका लागि आज अदालत उपस्थित गराइँदैछ । धनुषा प्रहरीले आज तेस्रो पटक म्याद थपका लागि सिरोहियालाई अदालत लैजाने तयारी गरेको गरेको हो ।
यसअघि थपिएको तीन दिनको म्याद सकिएसँगै थप अनुसन्धान गर्नु पर्ने भएकाले म्याद थपका लागि अदालत उपस्थित गराउन लागिएको प्रहरीले जनाएको छ ।
नागरिकता किर्ते सम्बन्धी कसुरमा सिरोहिया गत मंगलबार उनको कार्यालयबाटै पक्राउ परेका थिए । उनीमाथि अनुसन्धान गर्न प्रहरीलाई धनुषा जिल्ला अदालतले पहिलो र दोस्रो पटक तीन – तीन दिनको म्याद दिइसकेको छ
दोस्रो पटक म्याद थपेकै दिन सिरोहिया भने अस्पताल भर्ना भएका थिए । अहिले उनी जनकपुरधामकै सबै भन्दा सुविधा सम्पन्न अस्पतालमा उपचाररत छन् । उनलाई अस्पतालबाटै अदालत लैजाने प्रहरीले जनाएको छ ।
अदालत लैजानुअघि सिरोहियाको स्वास्थ्य अवस्थाबारे अस्पतालसँग जानकारी लिइने बुझ्ने धनुषाका प्रहरी प्रवक्ता डिएसपी रञ्जन अवाले जानकारी दिए ।
स्वास्थ्य अवस्था जटिल भए भिडियो कन्फरेन्स मार्फत जिल्ला सरकारी वकिलको कार्यालयसँग छलफल गरी अदालतमा म्याद थपको लागि सिफारिस गरिने प्रहरीको भनाई छ ।
उच्च रक्तचाप र मुटु सम्बन्धी समस्या देखिएको भन्दै सिरोहियालाई अस्पताल लगिएको थियो । प्रहरीको निगरानीमा अस्पतालमा रहेका सिरोहियालाई भेट्न रोक लगाइएको छ ।
