काठमाडौं महानगरपालिका च्याम्पियन

काठमाडौं, चैत ३०, काठमाडौं महानगरपालिकाले पाँचौं बागमती प्रदेशस्तरीय जुनियर आमन्त्रण मेयर कप तेक्वान्दो प्रतियोगिताको उपाधि शनिबार जितेको छ । काठमाडौंले ५ स्वर्ण, ४ रजत र ४ कांस्य जित्यो ।
काठमाडौं महानगरपालिकाको मुख्य प्रायोजनमा जैशीदेवल युथ क्लबले आयोजना गरेको प्रतियोगितामा नागार्जुन नगरपालिका ५ स्वर्ण, १ रजत र १ कांस्यसाथ दोश्रो भयो । तेश्रो स्थानमा रहेको आयोजक जैशीदेवलले ४ स्वर्ण, २ रजत र ५ कांस्य हात पा¥यो ।
स्युचाटारमा भएको प्रतियोगिताको ग्योरोगीतर्फ पुरुषमा जैशीदेवलका राहुलजंग लिम्बू तथा महिलामा चन्द्रागिरी नगरपालिकाकी स्मारिका शाही ठकुरी उत्कृष्ट खेलाडी घोषित भए । पुम्सेको पुरुषमा रोजिन प्रजापति तथा महिलामा एन्जिला मोक्तान उत्कृष्ट खेलाडी चुनिए । दुवै जैशीदेवलका हुन् । उत्कृष्ट चारैले जनही १ सय ५० अमेरिकी डलर पाए ।
प्रशिक्षकमा च्याम्पियन टिम काठमाडौंका सुजन खड्का उत्कृष्ट प्रशिक्षक तथा वच्चन मगर उत्कृष्ट निर्णायक बने । दुवैलाई समान १–१ सय अमेरिकी डलर प्रदान गरियो ।
विजेतालाई बागमती प्रदेशका मुख्यमन्त्री बहादुरसिंह लामा, तार्केश्वर नगरपालिकाका मेयर हरिकृष्ण महर्जनलगायतले एक कार्यक्रमबीच पुरस्कृत गरे । दुईदिने प्रतियोगितामा आयोजकको २ सहित २० टिमका ४ सय ३५ खेलाडीले विभिन्न २० स्पर्धामा प्रतिस्पर्धा गरेका थिए ।