पुस २०, काठमाडौं । स्थानीय फलफुल तथा तरकारी बाली प्रवद्र्धन तथा विक्री वितरणमा सक्रिय संस्था ग्रिन ग्रोथ नेपालले काठमाडौंमा ‘सिन्धुली जुनार मेला’ गर्ने भएको छ ।
ग्रीन ग्रोथ नेपालका संस्थापक एंव् पर्यावरण तथा जलवायु परिवर्तनको क्षेत्रमा क्रियाशील अभियन्ता सौरभ ढकालले माघ १३ देखि १५ गतेसम्म जुनार मेला आयोजना गर्न लागेको जानकारी दिनुभयो ।
उहाँले देशका सिमित क्षेत्रमा उत्पादन हुने जुनारलाई प्रवद्र्धन गर्नुका साथै सिन्धुलीमा उत्पादन भएको जुनार, जुनारको रस तथा अन्य परिकार मेलामा राखिने बताउनुभयो ।
उहाँले जुनार मेला काठमाडौंमा सबैलाई पायक पर्ने उपयुक्त स्थानमा गरिने समेत जानकारी दिनुभयो ।
जुनार उत्पादनमा पकेट क्षेत्र मानिएको सिन्धुलीको तिनकन्या, जलकन्या र रतनचुरा लगायतको महाभारत क्षेत्र जुनार उत्पादनका लागि उर्वर मानिन्छ । पल्छिलो समय जलकन्या आसपासमा जुनार भित्र किरा लाग्न थालेका कारण उक्त क्षेत्रमा उत्पादित जुनार त्यसै खेर जाने गरेका छन भने किसानहरूमा निराशा छाएकाे छ ।
