काठमाडौं । मंसीर २ , नेकपा एमालेका अध्यक्ष केपी शर्मा ओलीले मंसिर ७ गते हुने पार्टीको युवा–विद्यार्थीको प्रदर्शनमा निषेधित क्षेत्र नतोड्न र सरकारले प्रदर्शनका लागि कुनै स्थल तोक्यो भने त्यहीँ मात्र प्रदर्शन गर्न निर्देशन दिएका छन् ।
पार्टीको जनसंगठन समन्वय संयन्त्रले शनिबार पार्टी कार्यालय च्यासलमा गरेको कार्यक्रममा उनले निषेधित क्षेत्र नतोड्न निर्देशन दिएका हुन् । ‘हामी निषेधित क्षेत्र तोड्दैनौँ । निषेधाज्ञा तोड्दैनौँ, कुनै समय त्यस्तो आउन सक्छ कालान्तरमा’, उनले भने, ‘‘आन्दोलनका क्रममा के हुन्छ त्यो बेग्लै कुरा हो । आज निषेधाज्ञा तोडिँदैन, सरकारले स्थल विशेष हामीलाई तोक्यो भने हामी त्यही स्थल विशेषमा केन्द्रित हुन सक्छौँ । जुन रुट सरकारले भन्छ त्यो रुटमा हामी चल्न सक्छौँ, अहिले अवज्ञा गरेर जानपर्ने खालको स्थिति होइन ।’
एमालेले कसैसँग जाइलाग्ने नीति नलिएको दाबी गर्दै उनले भने, ‘अत्यन्तै संयमित ढंगले, तर अलि जोशिलो, आक्रामक होइन, हामी कुनै ताडफोड गर्दैनौँ । तोडफोड नगरी, आक्रामक नभई जोशिलो प्रदर्शन यसपल्ट गर्छौं । आफ्नो सुरक्षा आफैँ गर्छौं । अरु धेरै भर पर्दैनौँ, त्यो कुरा हामीले बुझ्या छौँ’, उनले भने ।
उनले अहिले माइतीघरलाई प्रदर्शनस्थल पनि तोकिए पनि पछि परिवर्तन हुन सक्ने बताए । ‘११ बजे माइतीघर मण्डला अहिले भनिएको छ, त्यो स्थान फरक पनि पर्न सक्छ भोलि गएर, सरकारले विभिन्न कारण त्यसलाई निषेधित क्षेत्र भन्यो भने अरुतिर जानुपर्ने हुन सक्छ, रत्नपार्क पनि जानपर्ने हुन सक्छ । त्यसो भयो भने सूचना आइहाल्छ,’ ओलीले भने ।
मंसिर ७ गते दुर्गा प्रसाईंले पनि काठमाडौं केन्द्रित प्रदर्शन कार्यक्रम राखेका छन् । एमालेले पनि सोही दिन युवा र विद्यार्थीको प्रदर्शन राखेकाले झडपको सम्भावना छ ।
