नेपाल टेलिकमले सुन्धारास्थित ग्राहक सेवा केन्द्रबाट मात्र वितरण भइरहेको इ–सिम मंगलबारदेखि थप केन्द्रहरुबाट वितरण गर्ने भएको छ ।
टेलिकमले भोलिदेखि कम्पनीको नक्शाल, चाबहिल, ठिमी, भक्तपुर, पाटन, गोंगबु र छाउनी कार्यालय र ग्राहक सेवा केन्द्र पुलचोकबाट पनि इ–सिम वितरण गर्ने भएको हो
इ–सिमका लागि यथेष्ट संख्या मौज्दात रहेको कम्पनीले जनाएको छ । ग्राहकको रुचि र मागलाई मध्यनजर गर्दै भदौ ३१ गतेदेखि हालसम्म दूरसञ्चार कार्यालय सुन्धारास्थित ग्राहक सेवा केन्द्रबाट ग्राहकहरूलाई निःशुल्क इ–सिम वितरण गरिरहेको छ ।
फिजिकल सिम प्रयोग गरिरहेका ग्राहकहरूले पोस्टपेड र प्रिपेड सिम हालका लागि निःशुल्क इ–सिममा परिवर्तन गर्न सक्नेछन् । नयाँ पोस्टपेड लिन चाहने ग्राहकलाई हालको बिक्री मूल्यमै इ–सिम उपलब्ध गराइने र नयाँ प्रिपेड सिमकार्ड लिन चाहने ग्राहकलाई निकट भविष्यमा सो सिम उपलब्ध गराइने टेलिकमले जनाएको छ ।
इ–सिम एक प्रकारको भर्चुअल अर्थात इलेक्ट्रोनिक सिम हो । इ–सिम उपलब्ध भएपछि अहिलेको जस्तो भौतिक रूपमा प्रयोग गरिने सिम कार्डको आवश्यकता पर्दैन । यसबाट फोन गर्ने र डाटा चलाउने लगायतका विभिन्न कार्य गर्न सकिन्छ ।
हाल भौतिक रुपममा सिम प्रगोग गरिरहेका ग्राहकहरुले इ–सिममा परिवर्तन गर्नुअघि सबैभन्दा पहिले आफ्नो मोबाइल सेटमा इ–सिम चल्ने–नचल्ने यकिन गरेर मात्र इ(सिमका लागि केन्द्रमा जान नेपाल टेलिकमले अनुरोध गरेको छ ।
क्यूआर कोडको सुविधा भएका पछिल्लो पुस्ताका मोबाइल सेटमा मात्र इ–सिम प्रयोग गर्न सकिन्छ । मोबाइल सेटमा इ–सिम इन्स्टल गर्नका लागि क्यूआर कोड मार्फत स्क्यान गर्नुपर्छ ।
यसका लागि आफ्नो मोबाइलबाट *#06# डायल गरेर थाहा पाउन सक्छन् । यसरी डायल गर्दा इआइडी लेखिएको संकेत सहित नम्बरहरू देखियो भने उक्त सेटमा इ–सिम चल्छ भने त्यस्तो नदिेखिए चल्दैन भनेर यकिन गर्न सकिन्छ ।
आइफोन र एन्ड्रोइड सिस्टमयुक्त मोबाइल सेटको सेटिङमा भएका विभिन्न अप्सन हेरेर पनि इ–सिम चल्ने वा नचल्ने पत्ता लगाउन सकिन्छ । आइफोन वा एन्ड्रोइडको सेटिङमा एड मोबाइल प्लान वा एड डाटा प्लान देखियो भने पनि त्यसमा सामान्यतः इ–सिम चल्छ भन्ने कुरा थाहा हुन्छ ।
