काठमाडौं । नेपालीहरुको दोस्रो ठुलो पर्व तिहारको चौथो दिन घरघरमा गाइको गोबरबाट निर्माण गरिएको पर्वतको आकृति र गोरुलाई पूजा गर्ने चलन रहेको छ ।
आज मुख्यगरी गोरुको पूजा गरिनुका साथै, हलिफाली जस्ता कृषिजन्य औजारको पनि पूजा गर्ने चलन छ ।
कृषिप्रधान नेपाली दैलोहरूमा हिउँदको सुरुवातसँगै वर्खायामभरि थन्काएर राखेका हलो, कुटो, कोदालो लगायतका औजारहरू बाहिर निकालेर आजका दिन पूजा गर्ने चलन छ । यस कारण पनि आजका दिनलाई हल तिहार भनिएको हो ।
कृषि कर्ममा सहयात्रा गर्ने जीवहरू गाई, गोरु लगायतको पनि आज पूजा गरिन्छ, उहिले उहिले त आजको दिन गाईको गोडा मुनीबाट छिर्ने चलन पनि थियो भन्ने लोक उक्तिमा पाइन्छ ।
गाईलाई पूजा गर्नाले गाईबाट आमाबाट पाएजस्तै माया पाइने धार्मिक विश्वासमा गाई पूजा गर्ने परम्परा रहेको हो ।
आज साझ घरघरमा युवायुवतीहरु मिलेर देउसी खेल्ने गरिन्छ । लक्ष्मीपूजाका दिन भैलो खेल्ने र हलतिहारका दिन देउसी खेल्ने परम्परा रहेको छ ।
