आज दसैंको सातौं दिन घरघरमा फूलपाति भित्त्राउदै

काठमाडौं । आश्विन शुक्ल सप्तमीका दिनमा मनाइने फूलपाती पर्व आज घर–घरमा फूलपाती भित्र्याएर मनाइँदै छ ।
घटस्थापनाका दिनदेखि विधिपूर्वक नवदुर्गा भवानीको पूजाआजा गरिएको दसैँ घरमा पूजा गर्ने चलन रहेको छ । फूलपातिका दिन शुभसाइतको प्रतीकका रूपमा उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र मानवृक्ष आदि भित्र्याउने परम्परा रहेको छ ।

गोरखाबाट ल्याइएको फूलपाती हनुमानढोका दरबारको दसैँघरमा भित्र्याउने चलन रहेको छ । गोरखाबाट धादिङ जिल्लाको जीवनपुरसम्म दसैँघरका पूजारीसहित मगर जातिका छ जनाले ल्याउने र धादिङ जिल्लाको जीवनपुरबाट काठमाडौँको जमलसम्म काठमाडौँबाट गएका ब्राह्मण जातिका छ जनाले ल्याउने परम्परा रहिआएको छ ।
फूलपाती लिन शनिबार नै राजधानीबाट एक समूह धादिङको जीवनपुर गइसकेको छ ।