साउन १८, काठमाडौँ । अमेरिकाको विदेश मन्त्रालयले नेपाललगायत ५० देशका नागरिकका लागि लागु गर्दै आएको भिसा धरौटी रकमसम्बन्धी कार्यक्रमलाई स्थायी गर्ने घोषणा गरेको छ । सोमबारदेखि यो नियम स्थायी रुपमा लागु हुनेछ । जसअनुसार अब बी १/बी २ भिसामा आवेदन दिनेहरूले अधिकतम २० हजार अमेरिकी डलरसम्म धरौटी राख्नुपर्ने हुनसक्छ ।
यो नयाँ निर्णयसँगै गत वर्ष अगस्ट २० देखि लागु भएको १२ महिने भिसा बन्ड पाइलट प्रोग्राम स्थायी हुनेछ । व्यावसायिक तथा पर्यटक भिसाका लागि आवेदन दिने निश्चित आवेदकहरूमा यो नियम लागु हुने अमेरिकी विदेश मन्त्रालयले जनाएको छ ।
अमेरिकाले गत वर्ष प्रयोगका रुपमा अघि सारेको यो नियम नेपालमा यसै वर्ष जनवरीदेखि लागु भएको थियो । जसअनुसार, काठमाडौंस्थित अमेरिकी दूतावासले बी १/ बी २ भिसा लिन चाहनेहरूसँग १५ हजार डलरसम्म धरौटी माग गर्दै आएको थियो ।
