काठमाडौं । ब्रिटिस काउन्सिलले नेपालमा ‘आइइएलटिएस उपहार २०२५’ को तेस्रो संस्करणका विजेताको घोषणा गरेको छ। १७ डिसेम्बर २०२५ मा आयोजित कार्यक्रममा विजेताहरूलाई पुरस्कृत गरिएको हो।
१५ अगस्टदेखि ३० नोभेम्बरसम्म आइइएलटिएसको पेपर वा कम्प्युटर आधारित परीक्षामा दर्ता भई शुल्क तिरेका विद्यार्थीहरू उक्त अभियानमा सहभागी थिए। सहभागीमध्ये ९७ जना विद्यार्थीले साप्ताहिक लक्की ड्रमार्फत उपहार जितेका थिए, जसको घोषणा ब्रिटिस काउन्सिलको फेसबुक पेजमार्फत गरिएको थियो।
यस वर्ष मासिक रूपमा तीन जना विजेता घोषित भएका छन्, जसले एप्पलको म्याकबुक एयर प्राप्त गरेका छन्। साथै, चार जनाले बम्पर पुरस्कारअन्तर्गत अन्तर्राष्ट्रिय हवाइ टिकट जितेका छन्। बेलायत, युरोप र अमेरिकाका लागि टर्किस एयरलाइन्सको प्रायोजनमा तीन जनाले एकतर्फी हवाइ टिकट प्राप्त गरेका छन् भने एक जनाले अस्ट्रेलिया जाने ब्रिटिस काउन्सिलको प्रायोजनमा हवाइ टिकट जितेका छन्।
पुरस्कार वितरण समारोहमा आइइएलटिएस दर्तामा योगदान पुर्याउने साझेदार संस्थामध्ये उत्कृष्ट तीन संस्थालाई पनि सम्मान गरिएको छ। आरटीसी इङ्लिस, सुमेधा एजुकेसन नेटवर्क र द नेक्स्ट एजुकेसन कन्सल्टेन्सीलाई आइप्याड प्रदान गरिएको छ।
समारोहमा बोल्दै ब्रिटिस काउन्सिल नेपालकी निर्देशक प्रतिष्ठा थापाले आइइएलटिएस उपहार अभियानले नेपालभर अंग्रेजी भाषा परीक्षणको पहुँच विस्तार गर्दै विद्यार्थीलाई उच्च शिक्षातर्फ आत्मविश्वासका साथ अघि बढ्न प्रेरित गरेको बताउनुभयो।
आइइएलटिएस (International English Language Testing System) उच्च शिक्षा तथा अन्तर्राष्ट्रिय आप्रवासनका लागि विश्वकै लोकप्रिय अंग्रेजी भाषा दक्षता परीक्षण प्रणाली हो, जसलाई विश्वभर १३ हजारभन्दा बढी संस्थाले मान्यता दिएका छन्। यो परीक्षा ब्रिटिस काउन्सिल र आइडीपीले संयुक्त रूपमा सञ्चालन गर्दै आएका छन्।
