विराटनगर । नेकपा (एमाले)का अध्यक्ष केपी शर्मा ओलीले एमालेले शुरू गरेको समृद्धि र विकासको अभियानबाट आत्तिएकाहरूले चौतर्फी आक्रमण र घेराबन्दी गरे पनि पार्टीले ती सबैलाई तोडेर अगाडि बढिरहेको वताउनुभएको छ ।
नेकपा (एमाले) कोशी प्रदेश कमिटीको प्रथम अधिवेशनको आज विराटनगरमा उद्घाटनपछि सम्बोधन गर्दै अध्यक्ष ओलीले सरकारमा रहँदा एमालेले देशको विकास र जनताको हितमा उल्लेख्य काम गरेको वताउनुभयो ।
नेकपा (एमाले) बाहेक जनताका समस्या बुझेको अर्को पार्टी नभएको भन्दै उहाँले नेपाली कांग्रेसका सभापति शेरबहादुर देउवा पाँच पटक र माओवादी केन्द्रका अध्यक्ष पुष्पकमल दाहाल ‘प्रचण्ड’ तीन पटक देशको प्रधानमन्त्री भएपनि केही काम गर्न नसकेको बताउनुभएको छ ।
अध्यक्ष ओलीले नेपाली कांग्रेसका सभापति देउवा र प्रधानमन्त्री प्रचण्डलाई आफ्नो कार्यकालमा गरेको एउटा राम्रो काम देखाउन चुनौती दिनुभयो ।
देशको अवस्था डामाडोल भएको बेला देशको प्रधानमन्त्री १५ दिनसम्म विदेश भ्रमणमा रहनु उचित नभएको उहाँको भनाइ छ ।
अध्यक्ष ओलीले पार्टीको कोशी प्रदेशको नेतृत्व सकेसम्म सहमति तथा समझदारीका आधारमा चयन गर्न निर्देशन दिनुभयो । उहाँले सकेसम्म सर्वसम्मत नेतृत्व चयन गर्न सुझाव दिनुभएको हो ।
अध्यक्ष ओलीले भन्नुभयो– सकेसम्म सर्वसम्मत नेतृत्व चयन गर्नुहोस्, भएन भने कुहिनो नठोकिनेगरी प्रतिष्पर्धा गर्नुहोस्, हारजीत भएपछि इगो नराख्नुहोस्, चित्त दुखाउने बिषय नबनाउनुस् ।
नेकपा (एमाले) अब मिसन ८४ मा लागेको बताउँदै उहाँले भन्नुभयो– मिसन ८४ भनेको हरेक वडामा कम्तीमा ५१ प्रतिशत एमाले पुर्याउने अभियान हो । तब मात्र हाम्रो विजय सुनिश्चित गर्न सकिन्छ ।
अध्यक्ष ओलीले गल्तीले माओवादी र माधव नेपालका पछि लागेकाहरूलाई पार्टीमा आउन आग्रह गर्नुभयो । भ्रमबाट मुक्त भएर एमालेमा आउन उहाँको आग्रह छ ।
प्राकृतिक र सांस्कृतिक हिसाबले निक्कै अघि भएर पनि कोशी प्रदेश विकासमा अघि बढ्न नसकेको औल्याउँदै अध्यक्ष ओलीले कोशी प्रदेशको विकासका लागि एमालेको नेतृत्व आवश्यक रहेको वताउनुभयो ।
अधिवेशनमा शुभकामना व्यक्त गर्दै पार्टीका बरिष्ठ उपाध्यक्ष ईश्वर पोखरेलले मिसन ८४ सफल बनाउन दृढतापूर्वक लाग्न निर्देशन दिनुभयो ।
उहाँले २०८४ मा हुने निर्वाचनमा एमाले एक्लै बहुमत ल्याउन चाहन्छ भन्नुभयो ।
मुलुकमा राजनीतिक स्थायित्व, आर्थिक विकास र समृृद्धिका लागि एमाले एक्लैले बहुमत ल्याउन जरूरी रहेको उहाँको तर्क छ ।
बरिष्ठ उपाध्यक्ष पोखरेलले सहमतिबाट नेतृत्व चयन गर्न सुझाव दिनुभयो । सहमति हुन नसके प्रतिष्पर्धाका नाममा गुटबन्दी र प्यानलबन्दी गर्ने छुट भने नभएको उहाँको भनाइ छ ।
अधिवेशनमा शुभकामना व्यक्त गर्दै महासचिव शंकर पोखरेलले कोशी प्रदेशमा पहिचानका नाममा एमालेमाथि प्रहार भएको बताउनुभयो ।
महासचिव पोखरेलले जब जब एमाले सरकारमा हुन्छ पहिचानको आन्दोलन हुने र नहँुदा नहुने कुरा एमालेमाथिको आग्रह भएको बताउनुभयो ।
महासचिव पोखरेलले एमालेले पहिचानलाई अतिवादका रूपमा नभई राष्ट्रिय शक्तिका रूपमा लिएर अघि बढ्न चाहेको बताउनुभयो ।
उहाँले अहिले जातीय र क्षेत्रीय नाममा जनतालाई विभाजित गर्न खोजिएको भन्दै सचेत रहनुपर्नेमा जोड दिनुभयो । महासचिव पोखरेलले विकल्पका नाममा पपुलिष्ट शक्तिहरूले समृृद्धिको आकांक्षा पूरा गर्न नसक्ने प्रष्ट पार्नुभयो ।
एमाले कोशी प्रदेश ईन्चार्ज रघुवीर महासेठ र स्थायी कमिटी सदस्य शिवमाया तुम्बाहाम्फेले अधिवेशन सफलताको शुभकामना व्यक्त गर्नुभयो । उद्घाटन समारोह प्रदेश अध्यक्ष तुलसी न्यौपानेको अध्यक्षतामा भएको थियो ।
