सिन्धुली । कमलामाइ नगरपालिका २ स्थित चियाबारीमा सोमबार बिहान भएको आगलागीबाट पाँच घर जलेर नष्ट भएका छन् ।
राति १ बजेबाट सुरु भएको आगलागीबाट टंक थापा, गंगा थापा र सीताराम थापाको घर जलेको प्रहरीले जनाएको छ ।
प्रहरीका अनुसार आगलागीमा परी नगद १० लाख नष्ट हुनुका साथै गरगहना र पसलका सामान जलेका छन् ।
टंक थापाको घर भाडामा लिएर व्यापार चलाउँदै आएकी अम्बिका बुढाथोकीले पूजापाठ गर्न दियो बालेर छाडेका बेला त्यहीँबाट आगो सल्किएको हुनसक्ने प्रहरीको प्रारम्भिक अनुसन्धानले देखाएको छ ।
आगलागीबाट सबैभन्दा बढी क्षति होटल व्यवसायी सन्तोष थापाको भएको बताइएको छ ।
आगलागी सुरु भएको डेढ घण्टा ढिलो मात्र दमकल पुगेकाले पनि क्षति धेरै भएको स्थानीयले बताएका छन् । यो वर्ष जिल्लाभरमा आगलागीबाट १९ घरगोठ जल्नुका साथै एक जनाको ज्यान भएको प्रहरीले जनाएको छ ।
