काठमाडौं, असोज ३१: नेपाल प्रिमियर लिग (एनपिएल) को फ्रेन्चाइज टोली कर्णाली याक्सले अग्नि इन्कर्पोरेटेड प्रालिको महिन्द्रालाई पावर्ड बाइ पार्टनरका रूपमा आबद्ध गरेको छ।
सम्बन्धित सम्झौतापत्रमा कर्णाली याक्सका क्रिकेट निर्देशक ज्ञानेन्द्र मल्ल र अग्नि इन्कर्पोरेटेड प्रालिकी वरिष्ठ मार्केटिङ म्यानेजर सन्तोषी नेपालले हस्ताक्षर गरेका छन्। यस सम्झौतासँगै महिन्द्रा एनपिएलको तेस्रो संस्करणमा कर्णाली याक्सको पावर्ड बाइ पार्टनरका रूपमा रहनेछ।
सम्झौतापछि कर्णाली याक्सका क्रिकेट निर्देशक मल्लले महिन्द्रासँगको सहकार्यले टोलीको तयारी र लक्ष्यप्रतिको यात्रामा थप ऊर्जा प्रदान गर्ने विश्वास व्यक्त गरे। “कर्णाली याक्सको यात्रामा महिन्द्राजस्तो प्रतिष्ठित ब्रान्ड जोडिनु हाम्रा लागि उत्साहजनक छ। नेपाली क्रिकेटको विकास र प्रवर्द्धनका लागि मैदानभित्रको प्रदर्शनसँगै मैदानबाहिरबाट प्राप्त हुने विश्वास र सहयोग पनि उत्तिकै महत्त्वपूर्ण हुन्छ। यस सहकार्यले हाम्रो टोलीप्रतिको विश्वासलाई थप बलियो बनाउनुका साथै समर्थक र साझेदारसँगको सम्बन्ध अझ सुदृढ गर्ने विश्वास लिएका छौँ,” मल्लले भने।
अग्नि ग्रुपका अध्यक्ष क्याबिनेट श्रेष्ठले खेलकुदले समुदायलाई जोड्ने र युवालाई प्रेरित गर्ने भएकाले नेपाली खेलकुदको विकासमा सहकार्य गर्नु समूहको प्राथमिकतासँग जोडिएको बताए। “खेलकुदले मानिसहरूलाई एकताबद्ध गर्नुका साथै युवामा आत्मविश्वास, अनुशासन र उत्कृष्ट बन्ने प्रेरणा जगाउँछ। राष्ट्रिय खेलाडीहरूलाई सशक्त बनाउने उद्देश्यसहित एपीएफका खेलकुद गतिविधिसँग लामो समयदेखि सहकार्य गर्दै आएको हाम्रो समूहका लागि कर्णाली याक्ससँग जोडिनु नेपाली खेलकुदप्रतिको प्रतिबद्धतालाई थप विस्तार गर्ने स्वाभाविक कदम हो। कर्णालीले दृढता, सम्भावना र अघि बढ्ने साहसको प्रतिनिधित्व गर्छ। महिन्द्रासँगको यस सहकार्यबाट टोलीको लक्ष्यलाई ऊर्जा प्रदान गर्नुका साथै नेपालमा क्रिकेट प्रतिभाको नयाँ पुस्तालाई प्रोत्साहित गर्न योगदान दिन पाउँदा हामी खुसी छौँ,” श्रेष्ठले भने।
एनपिएलको तेस्रो संस्करण अक्टोबर २६ देखि सुरु हुँदैछ। प्रतियोगिताका लागि कर्णाली याक्सले विदेशी खेलाडीका रूपमा स्कटल्यान्डका मार्क वाट तथा बंगलादेशका अकबर अली र अरिफुल इस्लामलाई अनुबन्ध गरिसकेको छ।
कर्णाली याक्सको प्रमुख प्रायोजकमा एक्स्ट्रिम,सह प्रायोजकमा एसियन पेन्ट्स, हेडगेयर पार्टनरमा प्लम्बर पाइप, कन्सल्टेन्सी पार्टनरमा प्राइम कन्सल्टेन्सी एन्ड सर्भिसेज तथा प्रिमियम भिट्रिफाइड टायल्स पार्टनरमा प्राइम टाइल्स रहेका छन्।
