काठमाडौँ। नाडा अटोमोबाइल एसोसिएशन अफ नेपालले पूर्वी नेपालका केही क्षेत्रमा देखा परेको अशान्तिपूर्ण गतिविधि र हिंसात्मक घटनाक्रमप्रति आफ्नो गम्भीर ध्यानाकर्षण भएको जनाएको छ। विशेषगरी सुनसरीको कप्तानगञ्ज लगायत तराईका केही जिल्लाहरूमा सिर्जित असहज परिस्थितिले उद्योग-व्यवसाय र समग्र अर्थतन्त्रमा प्रतिकूल प्रभाव पारेको भन्दै नाडाले चिन्ता व्यक्त गरेको हो।
बिहीबार एक विज्ञप्ति जारी गर्दै नाडाले नेपालको सामाजिक एकता, सद्भाव र सहिष्णुता नै राष्ट्रको सबैभन्दा ठूलो शक्ति भएको उल्लेख गरेको छ। संविधानले नागरिकलाई आफ्ना विचार र असहमति शान्तिपूर्ण रूपमा व्यक्त गर्ने अधिकार दिएको भए तापनि कुनै पनि प्रकारको तोडफोड, हिंसा वा सामाजिक सद्भाव बिगार्ने कार्य स्वीकार्य हुन नसक्ने नाडाको ठहर छ।
यस्ता अशान्तिपूर्ण घटनाले आम नागरिकको दैनिक जीवनका साथै उद्योग-व्यवसाय, लगानी र देशको समग्र अर्थतन्त्रलाई धराशायी बनाउने भएकाले सम्पूर्ण व्यवसायी समुदाय चिन्तित बनेको विज्ञप्तिमा जनाइएको छ।
नाडाले सम्बद्ध सबै पक्षलाई संयमता अपनाउन, कानुन र लोकतान्त्रिक प्रक्रियामार्फत संवाद र आपसी समझदारीबाट समस्याको शीघ्र समाधान खोज्न हार्दिक आग्रह गरेको छ। साथै, नेपाल सरकार तथा सुरक्षा निकायहरूलाई शान्ति सुरक्षा कायम गर्न, नागरिकको जिउधनको रक्षा गर्न र व्यावसायिक वातावरण यथाशीघ्र सहज बनाउन आवश्यक पहल गर्न अनुरोध गरिएको छ।
सामाजिक सद्भाव, राष्ट्रिय एकता र सहिष्णुतालाई थप सुदृढ बनाउन आ-आफ्नो ठाउँबाट सकारात्मक भूमिका निर्वाह गर्न पनि नाडाले सम्पूर्ण नेपाली नागरिकहरूमा हार्दिक अपिल गरेको छ।
