१२ साउन, सिरहा । सुनसरीको देवानगञ्ज गाउँपालिका–३, कप्तानगञ्जमा प्रहरीको गोली लागेर एक जना युवकको मृत्यु भएको घटनालाई लिएर सिरहामा विरोध प्रदर्शन चर्किएको छ। घटनाको निष्पक्ष छानबिन र दोषीमाथि कारबाहीको माग गर्दै स्थानीयहरूले सिरहाको गोलबजार नगरपालिका–८ स्थित पुरानो चोक चोहर्वामा पूर्व-पश्चिम राजमार्ग अवरुद्ध पारेर प्रदर्शन गरेका हुन्।
प्रदर्शनका क्रममा आक्रोशित स्थानीयहरूले सरकारले नै युवाको हत्या गरेको आरोप लगाउँदै प्रधानमन्त्री बालेन शाहको राजीनामा समेत माग गरेका छन्। उनीहरूले प्रहरी दमन बन्द हुनुपर्ने र गोली चलाउने प्रहरीमाथि कडा कारबाही हुनुपर्ने माग राख्दै नाराबाजी गरेका थिए।
यसअघि सोमबार पनि कर्जन्हा नगरपालिका–बन्दीपुरस्थित पूर्व–पश्चिम राजमार्गका साथै साँझ गोलबजारको गोलपार्क र धनगढीमाई नगरपालिका–८ कसहा चोकमा विरोध प्रदर्शन भएको थियो।
जिल्ला प्रहरी कार्यालय सिरहाका प्रहरी उपरीक्षक (एसपी) बासुदेव पाठकका अनुसार आन्दोलनकारीहरूले करिब आधा घण्टा पूर्व-पश्चिम राजमार्ग अवरुद्ध पारेका थिए। प्रदर्शनकारीहरूसँगको छलफल र सहमतिपछि अहिले भने राजमार्ग पुनः सञ्चालनमा आइसकेको प्रहरीले जनाएको छ।
