काठमाडौँ — नाडा अटोमोबाइल्स एशोसिएसन अफ नेपाल (नाडा) ले आफ्ना पूर्व अध्यक्ष शेखर गोल्छा माथि भइरहेको छानबिन र कारबाही प्रक्रियाप्रति गम्भीर ध्यानाकर्षण भएको जनाएको छ। नाडाले यस्ता गतिविधिले निजी क्षेत्र, उद्योग–व्यवसाय र समग्र लगानी वातावरणमा नकारात्मक सन्देश जाने चेतावनी दिएको छ।
नाडाका अनुसार शेखर गोल्छा नेपालका प्रतिष्ठित औद्योगिक तथा व्यावसायिक व्यक्तित्व हुन्। उनले नाडाको मात्र नभई समग्र निजी क्षेत्रको नेतृत्व गर्दै देशको आर्थिक विकास, रोजगारी सिर्जना र उद्योग प्रवर्द्धनमा उल्लेखनीय योगदान पुर्याएका छन्। यस्ता व्यक्तित्वमाथि तथ्य पुष्टि नहुँदै दबाब, नियन्त्रण वा सार्वजनिक रूपमा अपमान हुने किसिमका कदम चालिनु अनुचित भएको नाडाको ठहर छ।
संघले स्पष्ट शब्दमा भनेको छ— छानबिन हुनै नपर्ने भन्ने होइन, तर छानबिन कानुनी प्रक्रिया, निष्पक्षता र मर्यादाभित्र रहनुपर्छ। अनुसन्धानको नाममा व्यवसायीहरूलाई त्रसित बनाउने, नियन्त्रणमा लिने वा बदनाम गराउने कार्यले स्वदेशी तथा विदेशी लगानीकर्ताको आत्मविश्वास कमजोर बनाउने नाडाको भनाइ छ।
नाडाले पछिल्लो समय देखिएको सरकारी व्यवहारले “लगानीमैत्री नेपाल” भन्ने सरकारी नारा स्वयं कमजोर बनाइरहेको संकेत गरेको छ। निजी क्षेत्रलाई प्रोत्साहन गर्नुपर्ने अवस्थामा उल्टै हतोत्साहित गर्ने कार्यले मुलुकको आर्थिक समृद्धि यात्रामा अवरोध सिर्जना हुने संघको चेतावनी छ।
अन्त्यमा, नाडाले नेपाल सरकार र सम्बन्धित निकायसमक्ष शेखर गोल्छामाथि भइरहेको छानबिन प्रक्रिया निष्पक्ष, कानुनी र दबाबमुक्त ढंगले अघि बढाउन आग्रह गरेको छ। दोष प्रमाणित नभएसम्म कुनै पनि नागरिकको प्रतिष्ठा, आत्मसम्मान र व्यावसायिक गरिमाको रक्षा गर्नु राज्यको दायित्व भएको नाडाको स्पष्ट धारणा छ।
