काठमाडौं । बौद्ध तथा मेलम्ची ह्याङ्ग गुाठीको आयोजनामा विश्वशान्ति, अहिंसा र करुणाको सन्देश प्रवाह गर्ने उद्देश्यसहित २५७०औँ बुद्ध जयन्ती विविध धार्मिक तथा सांस्कृतिक कार्यक्रमसहित मनाइने भएको छ । आयोजक संस्थाले कार्यक्रमको विस्तृत कार्यतालिका सार्वजनिक गर्दै सम्पूर्ण भक्तजन तथा सर्वसाधारणलाई सहभागिताका लागि आह्वान गरेको छ ।
बुद्ध जयन्तीको अवसरमा बैशाख १५ गतेदेखि बुद्ध वचन (त्रिपिटक) पाठ तथा पूजा–अर्चना सुरु गरिनेछ । मुख्य कार्यक्रम भने बैशाख १८ गते ऐतिहासिक र धार्मिक महत्व बोकेको बौद्ध क्षेत्रमा आयोजना गरिने भएको हो ।
कार्यतालिकाअनुसार बुद्ध जयन्तीको दिन बिहान ७ बजे विश्व शान्तिको कामनासहित विशेष पूजा–पाठ गरिनेछ । त्यसपछि बिहान ९ बजे ऐतिहासिक गौतम बुद्धको मूर्ति तथा ८४ लाख देवी–देवताले समर्पण गरेको काष्यप बुद्धको अस्तु र स्वयंभूको अस्तु दर्शनार्थीका लागि बौद्ध तथा मेलम्ची ह्याङ्ग गुाठी गुम्बामा सार्वजनिक गरिनेछ ।
त्यसैगरी बिहान १०:३० बजे विभिन्न देशका कूटनीतिज्ञ, विशिष्ट अतिथि तथा धर्मगुरुहरूको उपस्थितिमा कार्यक्रमको औपचारिक उद्घाटन गरिनेछ । उद्घाटन समारोहमा शान्तिको प्रतीक परेवा जोडी उडाएर तथा संगी दीप प्रज्वलन गरी विश्व शान्तिको सन्देश प्रवाह गरिनेछ ।
कार्यक्रम अन्तर्गत ११:३० बजे विविध धार्मिक तथा सांस्कृतिक प्रस्तुति सम्पन्न गरी सहभागीहरूका लागि भोजन अवकाशको व्यवस्था गरिएको छ । दिउँसो २ बजेपछि ऐतिहासिक गौतम बुद्धको मूर्तिलाई बौद्ध महास्तूप परिसरमा विभिन्न धर्मावलम्बी गुरुहरू, संघसंस्था तथा भक्तजनको सहभागितामा परम्परागत परिक्रमा गरिनेछ । परिक्रमा परमपूज्य अवतारी धर्मगुरु चिनियाँ लामा, भूटि वज्र लामा ज्यू स्वयंको अगुवाइमा गरिने आयोजकले जनाएको छ ।
आयोजक संस्थाका अनुसार यस कार्यक्रमले बुद्ध शिक्षाको प्रचार–प्रसार गर्नुका साथै धार्मिक सहिष्णुता र विश्व शान्तिको सन्देशलाई थप सशक्त बनाउने अपेक्षा गरिएको छ । कार्यक्रममा देश–विदेशका श्रद्धालु भक्तजन तथा सर्वसाधारणको उल्लेख्य सहभागिता रहने विश्वास लिइएको छ ।
