काठमाडौं । नेपाल आयल निगमले पेट्रोलियम पदार्थको मूल्यमा भारी वृद्धि गरेको छ।
अन्तर्राष्ट्रिय बजारमा कच्चा तेलको मूल्यमा भएको वृद्धिका कारण निगमले पेट्रोलमा प्रतिलिटर १५ रूपैयाँ तथा डिजेल र मट्टितेलमा प्रतिलिटर १० रूपैयाँका दरले मूल्य बढाएको हो। बढेको नयाँ मूल्य साेमबार बिहान १ बजेदेखि लागू हुनेछ।
नयाँ मूल्य सूची अनुसार पहिलो वर्गमा रहेका चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा पेट्रोलको नयाँ मूल्य प्रतिलिटर १६९.५० रूपैयाँ र डिजेल/मट्टितेलको मूल्य १४९.५० रूपैयाँ कायम भएको छ।
त्यसैगरी, दोस्रो वर्ग अन्तर्गतका सुर्खेत र दाङमा पेट्रोलको मूल्य १७१ रूपैयाँ तथा डिजेल/मट्टितेलको मूल्य १५१ रूपैयाँ तोकिएको छ।
काठमाडौं, पोखरा र दिपायल क्षेत्रलाई समेट्ने तेस्रो वर्गमा पेट्रोलको मूल्य प्रतिलिटर १७२ रूपैयाँ पुगेको छ भने डिजेल र मट्टितेलको मूल्य १५२ रूपैयाँ कायम गरिएको छ।
निगमले जारी गरेको विज्ञप्ति अनुसार, इण्डियन आयल कर्पोरेशनबाट प्राप्त नयाँ खरिद मूल्यअनुसार इन्धनको मूल्य बढेर आएको छ। यदि मूल्य समायोजन नगरिएको खण्डमा निगमलाई इण्डियन आयल कर्पोरेशनलाई तिर्नुपर्ने रकम भुक्तानी गर्न समस्या हुने र यसले आपूर्ति प्रणालीमै थप अवरोध सिर्जना गर्ने अवस्था देखिएकाले बाध्य भएर मूल्य वृद्धि गर्नुपरेको निगमले जनाएको छ।
अन्तर्राष्ट्रिय बजारमा भएको मूल्य वृद्धिका कारण हालको मूल्य समायोजन पश्चात पनि निगमलाई पाक्षिक रूपमा करिब ३ अर्ब ९३ करोड रूपैयाँ घाटा हुने अवस्था रहेको छ। निगमले मूल्य स्थिरीकरण कोषबाट केही रकम व्यवस्थापन गर्दै तोकिएको मूल्य कायम गरेको हो।
