फागुन २९, काठमाडाैं ।सुदूरपश्चिम प्रदेशका मुख्यमन्त्री कमलबहादुर शाहले पाँच लाख रुपैयाँ घुस मागेको आरोप लागेपछि उक्त विषयमा निष्पक्ष छानबिन गर्न प्रमुख प्रतिपक्ष दल नेपाली कम्युनिष्ट पार्टी (नेकपा)ले माग गरेको छ।
मुख्यमन्त्री शाहमाथि वरिष्ठ डिभिजनल वन अधिकृत कृष्णदत्त भट्टले पाँच लाख रुपैयाँ घुस मागेको आरोप लगाएका हुन्।
बिहीबार संसदीय दलको कार्यालयमा आयोजित पत्रकार सम्मेलनमा नेकपा संसदीय दलका नेता खगराज भट्टले कर्मचारीले लगाएको गम्भीर आरोपलाई सम्बन्धित निकायले गम्भीरतापूर्वक लिएर निष्पक्ष छानबिन गर्नुपर्ने बताए।
उनले मुख्यमन्त्रीमाथि यस्तो गम्भीर आरोप लाग्दा पनि स्वयं मुख्यमन्त्रीले आवश्यक पहल नगरेको भन्दै प्रश्न उठाए।
“एउटा कर्मचारीले बोलेको विषयमा सञ्चारमाध्यममा मात्र स्पष्टिकरण दिने कुरा होइन। संसदको सार्वजनिक लेखा समिति छ, प्रदेशमा अख्तियार छ, अन्य छानबिन गर्ने निकाय पनि छन्,” उनले भने, “प्रतिपक्ष यो विषयमा छलफल र संवाद चाहन्छ, तर उहाँ किन अगाडि आउनुहुन्न ?”
वरिष्ठ डिभिजनल वन अधिकृत भट्टले हालै दिएको एक अन्तरवार्तामा मुख्यमन्त्री शाहले आफूलाई पाँच लाख रुपैयाँ घुस मागेको तर दिन नसकेपछि डिभिजन वन कार्यालय धनगढीको प्रमुख पदबाट हटाइएको दाबी गरेका थिए।
यता मुख्यमन्त्री शाहले भने आफूले घुस नमागेको दाबी गर्दै आएका छन्। मंगलबार धनगढीस्थित सरकारी निवासमा सञ्चारकर्मीसँग कुरा गर्दै उनले उक्त आरोपबारे छानबिन गर्न सम्बन्धित निकायलाई आग्रह गरेका थिए।
“छानबिन गर्ने धेरै निकाय छन्। तत्काल छानबिन होस्। यदि म दोषी ठहरिएँ भने कारबाही भोग्न तयार छु। होइन भने जथाभावी आरोप लगाउने कर्मचारीमाथि पनि कारबाही हुनुपर्छ,” उनले भनेका थिए।
यसअघि आर्थिक विवादमा मुछिएपछि तत्कालीन उद्योग, पर्यटन, वन तथा वातावरण मन्त्री रामेश्वर चौधरीलाई गत असारमा मुख्यमन्त्री शाहले बर्खास्त गरेका थिए। असारयता उक्त मन्त्रालयको जिम्मेवारी स्वयं मुख्यमन्त्री शाहले सम्हाल्दै आएका छन्।
