काठमाडौं । ग्लोबल आइएमई बैंकले सवा ६ अर्ब नाफा कमाएको छ । बैंकले बुधवार प्रकाशन गरेको गत आर्थिक वर्ष २०८१–८२ को चौंथो त्रैमासिक वित्तीय विवरणले यस्तो देखाएको हो ।
गत आवमा बैंकले ६ अर्ब २० करोड ४७ लाख ४५ हजार रुपैयाँ खुद नाफा कमाएको छ । यद्यपि, यो नाफा अघिल्लो आवको तुलानामा भने सामान्य १.०९ प्रतिशत मात्र धेरै हो । अघिल्लो आवमा पनि बैंकले ६ अर्ब १३ करोड ७४ लाख ५४ हजार रुपैयाँ खुद नाफा कमाएको थियो ।
बैंकले गत आवमा १६ अर्ब ७१ करोड २२ लाख ७७ हजार रुपैयाँ खुद ब्याज उठाएको छ । तर, यो आम्दानी अघिल्लो आवको तुलनामा ०.८५ प्रतिशत कमी हो । अघिल्लो आवमा बैंकको यस्तो आम्दानी १६ अर्ब ८५ करोड ६३ लाख रुपैयाँ रहेको थियो ।
यता, बैंकको संचालन नाफा पनि ८ अर्ब ७७ करोड ५ लाख ७८ हजार रुपैयाँ कायम भएको छ । यो अघिल्लो आवको तुलनामा ३.०१ प्रतिशत कमी हो ।
बैंकको वितरणयोग्य नाफा ५ अर्ब ३७ करोड ९३ लाख रुपैयाँ देखिएको छ । हाल बैंकको चुक्त पुँजी ३८ अर्ब ११ करोड ५८ लाख रुपैयाँ छ । यसका आधारमा बैंकले यो वर्ष आफ्ना सेयरधनीलाई १४.११ प्रतिशत लाभांश दिन सक्ने क्षमता बनाएको छ । बैंकले जगेडा कोषमा २४ अर्ब २१ करोड रुपैयाँ राखेको छ ।
बैंकको प्रतिसेयर आम्दानी १६.२८ रुपैयाँ र प्रतिसेयर नेटवर्थ १७७.६३ रुपैयाँ रहेको छ । गत आवमा बैंकको खराब कर्जा पनि बढेको देखिन्छ । यस्तो कर्जा गत आवमा ४.८७ प्रतिशत कायम भएको छ ।
बैंकको व्यवसायमा भने दोहोरो अंकको बढोत्तरी देखिएको छ । गत आवमा बैंकको निक्षेप संकलन १२.९५ प्रतिशत वृद्धि भएको छ । गत आवमा आइपुग्दा बैंकको निक्षेप संकलन ५ खर्ब ५० अर्ब ६२ करोड ८४ लाख रुपैयाँ कायम भएको छ । यता, कर्जा लगानी पनि ११.४६ प्रतिशत वृद्धि भई ४ खर्ब ११ अर्ब ७९ करोड १७ लाख रुपैयाँ पुगेको छ ।
