काठमाडाैं । ललितपुर ग्वार्कोमा निर्माणाधीन फ्लाइओभर जेठ भित्रै सञ्चालनमा ल्याइने भएको छ ।
भौतिक पूर्वाधार तथा यातायातमन्त्री देवेन्द्र दाहालले आइतबार स्थलगत अनुगमन गर्दै यसबारे जानकारी गराएका हुन् । काम सकिए लगत्तै फ्लाइओभरबाट सवारीसाधन सञ्चालन हुने उनको भनाइ छ ।
आइतबार बिहान फ्लाइओभर निर्माण कार्यको स्थलगत निरीक्षण क्रममा उनले निर्माणका बाँकी काम चाँडै पूरा गर्न निर्माण कम्पनीलाई निर्देशन दिए ।
‘अब पनि ढिलाइ गर्ने छुट छैन,’ मन्त्री दाहालले भने, ‘परिस्थिति बाहिरको प्राकृतिक विपत्ति नआए जेठ अन्त्यसम्ममा गाडी चल्नुपर्छ । यो एक प्रतीक्षारत आयोजना पनि हो ।’
हाल आवश्यक भागमा कालोपत्रको काम भइरहेको छ ।
आशिष समानान्तर रेलिगेर जेभी काठमाडौंले फ्लाइओभर निर्माणको काम गरिरहेको छ । १७ करोड ६ लाख ८८ हजार रुपैयाँ लागतमा निर्माण सुरु भएको फ्लाइओभर सुरु ठेक्का सम्झौता बमोजिम ११ फागुन २०८० मा सम्पन्न हुनुपर्ने थियो । तर, निर्धारित समयमा पूरा नभएपछि म्याद थप भई त्यसको निर्माण कार्य अघि बढेको हो ।
