काठमाडौं । चालु आर्थिक वर्षको पहिलो त्रैमाससम्म नेपाल टेलिकमको नाफा घटेको छ । सो अवधिसम्म कम्पनीको खुद नाफा १४.२० प्रतिशत खुम्चिएको छ ।
असोज मसान्तसम्म कम्पनीले १ अर्ब ७३ करोड ९५ लाख रुपैयाँ खुद नाफा कमाएको छ । गत आर्थिक वर्षको सोही अवधिसम्ममा कम्पनीले २ अर्ब २ करोड ७४ लाख रुपैयाँ खुद नाफा कमाएको थियो।
कुल आम्दानी घटेसँगै कम्पनीको खुद नाफा घट्न पुगेको हो। कम्पनीको कुल आम्दानी समीक्षा अवधिमा ५.४९ प्रतिशत घटेर १० अर्ब ६ करोड ३७ लाख रुपैयाँमा खुम्चिएको छ।
त्यस्तै वित्तीय आम्दानी ३३ प्रतिशत घटेर १ अर्ब १७ करोड ९१ लाख रुपैयाँमा सीमित बनेको छ।
कम्पनीको ग्राहकसँगको सम्झौता आम्दानी १.११ प्रतिशत बढेर ८ अर्ब ६८ करोड रुपैयाँ पुगेको छ ।
कम्पनीको प्रतिसेयर आम्दानी ६ रुपैयाँ ४० पैसा घटेर ३८ रुपैयाँ ६६ पैसामा झरेको छ। असोज मसान्तसम्ममा कम्पनीको प्रतिशेयर नेटवर्थ ५३५ रुपैयाँ ९ पैसा रहेको छ भने मूल्य आम्दानी अनुपात २५.८३ गुणा रहेको छ।
१८ अर्ब रुपैयाँ चुक्ता पूँजी रहेको यस कम्पनीको जगेडा कोषमा ७८ अर्ब ३१ करोड ५८ लाख रुपैयाँ सञ्चित छ।
