काठमाडौं । ट्रान्सपरेन्सी इन्टरनेशनल नेपालले सरकारको नेतृत्व गरिरहेको दल नेकमा एमालेले जग्गा दान लिएको विषयमा आपत्ति जनाएको छ ।
ट्रान्सपरेन्सी इन्टरनेशनल नेपाल शाखाले सोमबार विज्ञप्ती मार्फत नेकपा एमालेको पार्टी कार्यालय भवन निर्माणको लागि भाटभटिनी प्रालीका सञ्चालक मिनबहादुर गुरुङ्गले १० रोपनी १४ आना जग्गा दान गरेकोप्रति आपत्ति जनाएको हो ।
विज्ञप्तीमा संस्थाले गरेको दानमा व्यक्ति नेपाल सरकार वादी रहेका विभिन्न मुद्दामा अदालतले दोषी ठहर गरेको र निजमाथि सोही प्रकृतिका थप विभिन्न मुद्दाहरु न्यायिक प्रक्रियामा नै रहेको सर्वविदितै रहेको भन्दै कानूनको पालना गरी गराई सरकारी सम्पत्ति र हितको संवर्धन गर्न जनताबाट निर्वाचित भई सरकारको नेतृत्व गरिरहेको पार्टीले यस प्रकारको दान दातव्य लिंदा वादी–प्रतिवादीमा हुनुपर्ने व्यवहारमा गम्भीर असर पर्न गई सरकार वादी रहेको मुद्दामा प्रतिकूल प्रभाव पर्ने जनाएको छ ।
प्रतिवादीसँगको यस्तो लेनदेनका कारण स्वार्थको द्वन्द्व हुन गई सुशासनमा गम्भीर असर पर्ने र भ्रष्टाचारको पक्षपोेषण हुने ठम्याइ टीआई नेपालको रहेको छ ।
सरकारको नेतृत्व गर्ने व्यक्ति वा दलले सरकार वादी रहेको मुद्दाका प्रतिवादी व्यक्ति वा पक्षबाट सरकारको लागि होस् वा पार्टीको नाममा होस् कुनै पनि प्रकारको दान, दातव्य र सहयोग स्वीकार गर्ने प्रवृत्तिले सुशासनको अपव्याख्या भई देशमा व्याप्त भ्रष्टाचारलाई थप मलजल पुग्न जाने देखिन्छ ।
सरकार संचालनमा संलग्न रहेका व्यक्ति तथा राजनीतिक दललाई यस प्रकारका काम कारवाहीबाट अलग रहन टीआई नेपाल अपील गरेको छ ।
