काठमाडौं । नेपाल टेलिकमले एक वर्षमा साढे ६ अर्ब नाफा कमाएको छ । कम्पनीले बिहीबार प्रकाशन गरेको गत आर्थिक वर्ष २०८०–८१ को चौंथो त्रैमासिक वित्तीय विवरणले यस्तो देखाएको हो ।
गत आवमा टेलिकमले ६ अर्ब ६१ करोड ७७ लाख ७६ हजार रुपैयाँ नाफा कमाएको छ । तर, यो नाफा अघिल्लो आवको तुलनामा भने १६.४४ प्रतिशत कमी हो । अघिल्लो आवमा भने कम्पनीले ७ अर्ब ९२ करोड १ लाख ५५ हजार रुपैयाँ नाफा कमाएको थियो ।
कम्पनीको आम्दानीमा भएको गिरावटले नाफा प्रभावित भएको छ । अघिल्लो आवको तुलनामा कम्पनीको आम्दानी ४.९९ प्रतिशत घटेर ३४ अर्ब ४६ करोड ११ लाख रुपैयाँ कायम भएको छ ।
यता, अघिल्लो आवमा कम्पनीको कुल आम्दानी ४४ अर्ब ४२ करोड ३६ लाख रुपैयाँ रहेको थियो । तर, गत आवमा आइपुग्दा भने कम्पनीको यस्तो आम्दानी ६.३२ प्रतिशत घटेर ४१ अर्ब ६१करोड ७१ लाख रुपैयाँ कायम भएको छ । यस्तै, कम्पनीको वित्तीय आम्दानी १६.६८ प्रतिशत घटेर ६ अर्ब ४८ करोड १९ लाख रुपैया कायम भएको छ।
गत आवमा कम्पनीको प्रतिसेयर आम्दानी (इपिएस) पनि घटेर ३६ रुपैयाँ ७७ पैसा कायम भएको छ । प्रतिसेयर नेटवर्थ पनि ५२५ रुपैयाँ ४३ पैसा कायम भएको छ। हाल कम्पनीको चुक्ता पुँजी १८ अर्ब रुपैयाँ छ । कम्पनीको जगेडा तथा कोषमा भने ७६ अर्ब ५७ करोड ७० लाख रुपैयाँ रहेको छ ।
