फागुन २३, काठमाडौं । पशुपति क्षेत्र विकास कोषले शुक्रबार परेको महाशिवरात्री पर्वको तयारी अन्तिम चरणमा पुगेको जनाएको छ ।
कोषले बुधबार पत्रकार सम्मेलन गरी महाशिवरात्री पर्व भव्य र सभ्य रुपमा सफल पार्न कोषका पदाधिकारीबीच जिम्मेवारी बाढेर अघि बढेको जनाएको छ ।
महाशिवरात्रीका दिन पाशुपत क्षेत्रको चार स्थानबाट पशुपत क्षेत्र प्रवेशगरी भक्तजनलाई मन्दिर दर्शन गर्ने प्रवन्ध मिलाएको छ । भक्तजनको सुविधाका लागि अस्थायी सौचालय, स्वास्थ्यकेन्द्र र सकेसम्म छिटोछरीतो ढंगले दर्शनगर्न मिल्नेगरी तयारी गरीरहेको जनाएको छ ।
साधुसन्त तथा बाबाका लागि दाउरा सहितको खाना तथा आवासको समेत प्रतिबन्ध मिलाइसकिएको जनाएको छ । कोषले महाशिवरात्री पर्वका लागि १ करोड ५० लाख खर्चहुने अनुमान समेत गरेको छ ।
