फागुन १५ , काठमाडौं । प्रहरीले सिंहदरबार र संघीय संसद भवन पर्खालसँग जोडिएका पैदलमार्गमा सर्वसाधारणलाई हिड्न रोक लगाएको छ ।
लघुवित्तका ऋणीहरुको समूह सोमबार नयाँ बानेश्वरस्थित संसद् भवन प्रवेश गरेपछि झस्किएको प्रहरीले सिंहदरबार र बानेश्वर वरपरका फुटपाथमा पनि हिँड्न रोक लगाइएको हो ।
सिंहदरबारको पर्खालसँगै जोडिएको फुटपाथमा डोरी टाँगेर निषेधित क्षेत्र लेखिएको छ । त्यक्षेत्रमा फुटपाथ प्रयोग गर्न रोक लगाइएको हो । संघीय संसद भवन नयाँ बानेश्वरको पर्खालसँग जोडिएको फुटपाथमा पनि डोरी टाँगिएको छ ।
सिंहदरबार र बानेश्वरका फुटपाथमा अघिल्ला दिनहरुमा भन्दा धेरै प्रहरी परिचालन गरिएको छ । उनीहरुले सर्वसाधारणलाई डोरी टाँगिएको क्षेत्रमा हिँड्न दिएको छैन । फुटपाथमा हिँड्न नपाएपछि सर्वसाधारण जोखिम मोलेर सडकबाटै हिँड्न बाध्य भएका छन् ।
सोमबार लघुवित्तका ऋणीहरुको झण्डै ५० जनाको समूह संघीय संसद भवनमा प्रवेश गरेपछि गृह मन्त्रालयले भवनको बाहिरी सुरक्षामा खटिने प्रहरी निरीक्षकसहित ३२ जनाको जिम्मेवारी खोसेको थियो ।
यो घटनाको छानबिनका लागि प्रहरीले उपत्यका प्रहरी कार्यालयका एसएसपी दिनेशराज मैनालीको नेतृत्वमा छानबिन समिति नै गठन गरेको छ ।
उपप्रधानमन्त्री तथा गृहमन्त्री नारायणकाजी श्रेष्ठले सोमबार साँझ नै सुरक्षा निकायका प्रमुखहरुको आकस्मिक बैठक बोलाएका थिए ।
